Kavitha: ‘కవితక్క’ అంటూ చాట్.. సుఖేష్ వాట్సాప్ మేటర్ కలకలం..

Kavitha News(Delhi Liquor Case Updates) : కవితక్క ఫుల్‌గా ఇరుక్కుపోతున్నట్టు కనిపిస్తోంది. ఢిల్లీ లిక్కర్ స్కాం కేసులో ఆమె పాత్రపై బలమైన సాక్షాలు బయటకి వస్తున్నాయి. అయితే, దర్యాప్తు సంస్థల నుంచి కాకుండా.. ఓ తీహార్ జైలు ఖైదీ వల్ల కవిత చిక్కుల్లో చిక్కుకునే అవకాశం కనిపిస్తోంది. ఖైదీ సుఖేష్ చంద్రశేఖర్.. ఇప్పటికే బీఆర్ఎస్ పార్టీపై సంచలన ఆరోపణలు చేశారు. జైలు నుంచి వరుస లేఖలు రాస్తూ.. గులాబీ నేతలను ఇరకాటంలో పడేస్తున్నారు. తన టార్గెట్ ఢిల్లీ సీఎం కేజ్రీవాల్ అని చెబుతున్నా.. మేటర్ అంతా కవిత చుట్టూ తిరుగుతుండటం ఆసక్తికరంగా మారింది.

బీఆర్ఎస్ పార్టీ ఆఫీసులో పార్క్ చేసి ఉన్న కారులో ఉన్న ఏపీ అనే వ్యక్తికి మూడు దఫాలుగా 45 కోట్లు ఇచ్చానంటూ సంచలన ఆరోపణలు చేశారు సుఖేష్. ఆ తర్వాత మరో లెటర్‌లో ఆ ఏపీ అంటే మరెవరో కాదు అరుణ్ పిళ్లై అంటూ బాంబు పేల్చాడు. ఢిల్లీ లిక్కర్ స్కాంలో కవితకు పిళ్లై బినామీగా ఉన్నారంటూ ఈడీ భావిస్తుండటంతో సుఖేష్ చేసిన కామెంట్లు రాజకీయంగా కలకలం రేపాయి. ఆ పిళ్లై.. బీఆర్‌ఎస్‌కు చెందిన సౌత్ గ్రూప్ హెడ్ అంటూ పరోక్షంగా కవిత గురించి హింట్ కూడా ఇచ్చాడు సుఖేశ్. లేటెస్ట్‌గా నేరుగా ఎమ్మెల్సీ కవితతో జరిపిన వాట్సాప్ చాట్ ను రిలీజ్ చేసి మరింత సంచలనంగా మారాడు.

మొత్తం ఆరు పేజీల లేఖ. అందులో కవిత, టీఆర్ఎస్ అనే పేరుతో సేవ్ చేసి ఉన్న నెంబర్‌తో చేసిన వాట్సాప్ చాట్ స్క్రీన్ షాట్సే ఎక్కువగా ఉన్నాయి. హాయ్ అక్క.. 15 కేజీల నెయ్యి డెలివరీ చేశా.. ప్యాకెట్ మీకు అందజేస్తానని ఏకే చెప్పారు.. ఇలా సాగింది ఆ వాట్సాప్ చాట్. అటునుంచి ఓకే అనే రిప్లై వచ్చింది. ఇక, నెయ్యి అంటే క్యాష్ అని గత లేఖలోనే సుఖేష్ తెలిపాడు.

మీ నాన్న ఎలా ఉన్నారు? అంటూ కవిత పేరుతో ఉన్న నెంబర్ నుంచి మెసేజ్ వచ్చినట్టు ఉంది. థ్యాంక్యూ అక్కా.. మా నాన్నకు ప్రస్తుతం కీమో జరుగుతోందంటూ సుఖేష్ ఆన్సర్ ఇచ్చినట్టు ఆ చాట్‌ను బట్టి తెలుస్తోంది. 98101 54102 నెంబర్‌తో సుఖేష్ చాటింగ్ చేశాడు. ఏకే, ఎస్‌జే, ఏపీ, సిస్టర్.. ఇలా కోడ్ నేమ్స్‌తో ఆ చాటింగ్ జరిగింది. ఇందులో ఏకే అంటే అరవింద్ కేజ్రీవాల్, ఎస్‌జే అంటే సత్యేంద్ర జైన్ అని తెలుస్తోంది.

అయితే, సుఖేష్ రిలీజ్ చేసిన చాట్‌పై బీఆర్ఎస్ అనుమానాలు వ్యక్తం చేస్తోంది. చాటింగ్‌తో పలు తెలుగు పదాలు ఉన్నాయని.. మరి, తెలుగు భాష రాని సుశేష్ తెలుగు పదాలు ఎలా వాడాడని గులాబీ నేతలు డౌట్ పడుతున్నారు. ఇదంతా బీజేపీ కుట్ర అంటూ ఆరోపిస్తోంది.