KCR : తెలంగాణ ముఖ్యమంత్రి కేసీఆర్ పుట్టినరోజును తెలంగాణలో ఘనంగా జరుపుకుంటున్నారు. పార్టీ నేతలు, అభిమానులు వేడుకలు నిర్వహిస్తున్నారు. రాష్ట్రవ్యాప్తంగా బీఆర్ఎస్ కార్యకర్తలు సీఎం పుట్టినరోజు వేడుకలను ఘనంగా చేస్తున్నారు. ప్రధానమంత్రి నరేంద్ర మోదీ కేసీఆర్కు జన్మదిన శుభాకాంక్షలు తెలిపారు. కేసీఆర్ చిరకాలం ఆరోగ్యంగా ఉండాలని ఆకాంక్షించారు.
పలువురు ప్రముఖులు, రాజకీయ నేతలు కేసీఆర్ కు బర్త్ డే విషెస్ చెప్పారు. గవర్నర్ తమిళిసై సౌందరరాజన్.. సీఎం కేసీఆర్కు జన్మదిన శుభాకాంక్షలు తెలిపారు.
మరోవైపు హైదరాబాద్లోని కాచిగూడలో జరిగిన కేసీఆర్ బర్త్ డే వేడుకల్లో అపశ్రుతి చోటుచేసుకుంది. అంబర్పేట ఎమ్మెల్యే కాలేరు వెంకటేష్కు తృటిలో ప్రమాదం తప్పింది. బాణసంచా పేలుస్తుండగా నిప్పు రవ్వలు పడి బెలూన్లు పేలిపోయాయి. దీంతో అందరూ ఒక్కసారి పరుగులు పెట్టారు. ఈ క్రమంలో తోపులాట జరిగింది. ఈ ఘటనలో ఎమ్మెల్యే కాలేరు వెంకటేష్, మరొకొందరు కార్యకర్తలు కిందపడిపోయారు. దీంతో ఎమ్మెల్యేకు, కార్యకర్తలకు స్వల్పగాయలు అయ్యాయి.