CM Revanth Reddy: గ్రాడ్యుయేట్ ఎమ్మెల్సీ ఉప ఎన్నికల్లో కాంగ్రెస్ అభ్యర్థి తీన్మార్ మల్లన్న ఘన విజయం సాధించారు. దీంతో సీఎం రేవంత్ రెడ్డి తీన్మార్ మల్లన్నకు శుభాకాంక్షలు తెలిపారు. మల్లన్న విజయానికి కృషి చేసిన నేతలు, కార్యకర్తలకు సీఎం అభినందనలు తెలిపారు.
వరంగల్, ఖమ్మం, నల్గొండ పట్టభద్రుల ఎమ్మెల్సీ ఉపఎన్నికల్లో కాంగ్రెస్ అభ్యర్థి మల్లన్న విజయం సాధించారు. కాంగ్రెస్ అభ్యర్థిగా పోటీచేసిన చింతపండు నవీన్.. అలియాస్ తీన్మార్ మల్లన్న బీఆర్ఎస్ అభ్యర్థి రాకేష్ రెడ్డిపై విజయ దుందుభి మోగించారు. బుధవారం ఉదయం 8 గంటలకు ఓట్ల లెక్కింపు ప్రారంభమవగా.. లెక్కింపు సుదీర్ఘంగా శుక్రవారం అర్థరాత్రి వరకు కొనసాగింది.
మూడు రోజుల పాటు ఉత్కంఠగా సాగిన ఈ ప్రక్రియలో తొలి ప్రాధాన్యత ఓట్ల లెక్కింపు నుంచి ఎలిమినేట్ ప్రక్రియ వరకు తీన్మార్ మల్లన్నకు రాకేష్ రెడ్డి గట్టి పోటీ ఇచ్చారు. ఎలిమినేట్ ప్రక్రియలో రాకేష్ రెడ్డి , మల్లన్న కంటే సుమారు 4 వేల ఎక్కువ ఓట్లు సాధించినా.. అప్పటికే మొదటి ప్రాధాన్యంలో మల్లన్నకు 19 వేలకు పైగా ఆధిక్యం దక్కింది.
Also Read: రేపే గ్రూప్ -1 ప్రిలిమినరీ పరీక్ష.. నిమిషం ఆలస్యమైనా నో ఎంట్రీ
మొదటి ప్రాధాన్యత ఓట్ల లెక్కింపు తేలకపోవడంతో రెండో ప్రాధాన్యత ఓట్ల లెక్కింపు తర్వాత అధికారులు మల్లన్న విజయాన్ని ధ్రువీకరించారు. అయితే మల్లన్న విజయం పట్ల సీఎం రేవంత్ రెడ్డి హర్షం వ్యక్తం చేశారు. ఈ మేరకు స్పెషల్ ట్వీట్ చేశారు. ఎమ్మెల్సీ ఎన్నికల్లో విజయం సాధించిన నవీన్‌కుమార్ కు శుభాకాంక్షలు..మల్లన్న గెలుపు కోసం కృషి చేసిన కార్యకర్తలకు అభినందనలు అని ట్వీట్ చేశారు.
నల్గొండ – ఖమ్మం – వరంగల్ పట్టభద్రుల నియోజకవర్గం నుండి కాంగ్రెస్ పార్టీ అభ్యర్థిగా శాసన మండలికి ఎన్నికైన చింతపండు నవీన్ కుమార్ (తీన్మార్ మల్లన్న) గారికి శుభాకాంక్షలు.
ఆయన గెలుపు కోసం కృషి చేసిన కార్యకర్తలకు, నాయకులకు అభినందనలు.@TeenmarMallanna
— Revanth Reddy (@revanth_anumula) June 8, 2024