Modi Ji Thali(Narendra modi news telugu) : ప్రధాని మోదీ ప్రపంచ వ్యాప్తంగా క్రేజ్ సంపాదించారు. అమెరికా, ఆస్ట్రేలియా ఇలా ఏ దేశానికి వెళ్లినా అపూర్వ స్వాగతం లభిస్తోంది. అక్కడ ఉండే ప్రవాసులు మోదీకి బ్రహ్మరథం పడుతున్నారు. ప్రధాని మోదీ త్వరలో అమెరికాలో పర్యటించనున్నారు. ఈ నేపథ్యంలో భారత్ పీఎంకు ఘన స్వాగతం చెప్పేందుకు భారీగా ఏర్పాట్లు జరుగుతున్నాయి. ప్రధాని మోదీ పర్యటన సందర్భంగా స్పెషల్ థాలి వంటకం రెడీ చేసింది అమెరికాలోని ఓ రెస్టారెంట్.
న్యూజెర్సీలో ఓ రెస్టారెంట్ మోదీజీ థాలి పేరుతో ఈ వంటకం తయారు చేస్తోంది. ఈ వంటకాన్ని శ్రీపాద్ కులకర్ణి అనే చెఫ్ తయారు చేస్తున్నారు. భారతీయ సంప్రదాయ వంటకాలు ఇందులో ఉంటాయి. కిచిడీ, రసగుల్లా, సర్సన్ కా సాగ్, కాశ్మీరీ దమ్ ఆలూ, ఇడ్లీ, దోక్లా, చాంచ్, పాపడ్ ఈ థాలిలో ఉంటాయి.
భారత్ ప్రభుత్వం చేసిన ప్రతిపాదనలతో 2023 సంవత్సరాన్ని మిల్లెట్స్ ఏడాదిగా యూఎన్ డిక్లేర్ చేసింది. దీనికి గుర్తుగా మిల్లెట్స్ తో మోదీజీ థాలి చేస్తున్నారు. వంటకాల తయారీకి మిల్లెట్స్ నే ఉపయోగిస్తున్నారు. ప్రవాస భారతీయుల విజ్ఞప్తితో ఈ వంటకాన్ని తయారు చేస్తున్నామని రెస్టారెంట్ యాజమాని తెలిపారు.
కేంద్ర విదేశీవ్యవహారాల శాఖ మంత్రి జైశంకర్ కు అంకితం చేస్తూ మరో స్పెషల్ థాలి చేయించాలని ఆ రెస్టారెంట్ యజమాని భావిస్తున్నారు. దాని పేరు డాక్టర్ జైశంకర్ థాలిగా పెట్టనున్నారు. మోదీ పేరుతో ఇలా వంటకాలు చేయడం తొలి సారి కాదు. గతేడాది సెప్టెంబర్ 17న మోదీ బర్త్ డే సందర్భంగా 56 ఇంచ్ మోదీ థాలిని ఢిల్లీలోని ఓ రెస్టారెంట్ తయారు చేసింది.
అమెరికా అధ్యక్షుడు జో బైడెన్ ఆహ్వానంతో ప్రధాని మోదీ అమెరికా వెళుతున్నారు. జూన్ 21 న యూఎస్ లో అడుగుపెడతారు. అమెరికా ప్రెసిడెంట్ జూన్ 22న మోదీకి డిన్నర్ ఇవ్వనున్నారు. మోదీ అమెరికా పర్యటన నేపథ్యంలో యూఎస్ నేషనల్ సెక్యూరిటీ సలహాదారు జాక్ సుల్లివన్ జూన్ 13న ఢిల్లీ రానున్నారు. రెండురోజుల పర్యటనలో వివిధ అంశాలు చర్చించనున్నారు. మోదీ అమెరికా పర్యటనకు వారం ముందే ఆయన భారత్ వస్తున్నారు.