Vijay Sethupathi: హీరోలందరి యందు విజయ్ సేతుపతి వేరయా.. అంటే నిజమే అంటారు. అందుకు కారణం అతను ఎంచుకొనే కథలు. చిన్న చిన్న పాత్రలు చేస్తూ హీరోగా మారి.. ఇప్పుడు స్టార్ హీరోగా కొనసాగుతున్న ఏ హీరో కూడా.. విజయ్ సేతుపతిలా సినిమాలు చేయలేడు. కథ నచ్చితే.. అందులో తన పాత్రకు ప్రాధాన్యత ఉంటే.. అది ఎలాంటి పాత్ర అయినా కూడా చేయడానికి విజయ్ సేతుపతి వెనుకాడడు. హీరో, విలన్, సపోర్టింగ్ రోల్ .. ఏదైనా సరే రెడీ అంటాడు. అలా ఆయన ఏ సినిమా చేస్తే ఆ సినిమా హిట్ కావడం పక్కా.
తాజాగా విజయ్ సేతుపతి నటించిన మహారాజా కూడా మంచి పాజిటివ్ టాక్ ను అందుకుని విజయం వైపు దూసుకెళ్తోంది. నిదిలన్ సామినాథన్ దర్శకత్వం వహించిన ఈ సినిమా ఈరోజు ప్రేక్షకుల ముందుకు వచ్చి ప్రేక్షకులను అలరిస్తుంది. ఈ సినిమ అనౌన్స్ చేసిన దగ్గరనుంచి ప్రేక్షకుల్లో అంచనాలు ఎక్కువ అయ్యాయి. ఇక ట్రైలర్ లో నా లక్ష్మీ పోయింది అని చెప్పి పోలీస్ స్టేషన్ కు వెళ్లి ఫిర్యాదు చేసిన హీరో.. ఆ లక్ష్మీ ఎవరు అనేది చెప్పకుండా సినిమాపై ఆసక్తి పెంచారు.
ఈరోజు థియేటర్ లో ఆ లక్ష్మీ ఎవరో చూసి అభిమానులు ఖంగుతిన్నారు. డైరెక్టర్ కథను నేరేట్ చేసిన విధానం, విజయ్ సేతుపతి నటన వెరసి సినిమా సూపర్ హిట్ అయ్యేలా కనిపిస్తుందని అభిమానులు చెప్పుకొస్తున్నారు. కథ రొటీన్ అయినా చూపించిన విధానం బావుందని చెప్పుకొస్తున్నారు. కామెడీ,తండ్రి కూతుళ్ళ ఎమోషన్, సెంటిమెంట్ బాగా వర్క్ అవుట్ అయ్యిందని అంటున్నారు.
ఇక ఈ మధ్యకాలంలో ది బెస్ట్ స్క్రీన్ ప్లే తో వచ్చిన సినిమాలలో ఒకటిగా ఈ మహారాజా నిలుస్తుంది అనడంలో ఎలాంటి సందేహం లేదని ఫ్యాన్స్ కామెంట్స్ చేయడం విశేషం. మంచి టాక్ రావడంతో కలక్షన్స్ కూడా ఆ రేంజ్ లోనే రానున్నాయి. మరి ఆ కలక్షన్స్ వివరాలు తెలియాలంటే రేపటి వరకు ఆగాల్సిందే. ఇక ఈ సినిమా చూసిన అభిమానులు.. వస్తాడు.. హిట్ కొడతాడు.. రిపీట్.. ఈయనకు ఇదే పని చెప్పుకొస్తున్నారు.