Tollywood Producers: తెలుగు చలన చిత్ర పరిశ్రమ అభివృద్ధికి తనవంతు కృషి చేస్తానని తెలంగాణ సినిమాటోగ్రఫీ మంత్రి కోమటిరెడ్డి వెంకట్రెడ్డి నిర్మాతలకు హామీ ఇచ్చారు. తెలుగు సినీ పరిశ్రమ ప్రముఖులు కోమటిరెడ్డి వెంకట్ రెడ్డిని మర్యాదపూర్వకంగా కలిసి అభినందనలు తెలిపారు. ఈ సందర్భంగా చిత్ర పరిశ్రమ ఎదుర్కొంటున్న సమస్యలను మంత్రి దృష్టికి తీసుకొచ్చారు. ముఖ్యమంత్రి దృష్టికి తీసుకెళ్లి సమస్యల పరిష్కారానికి కృషి చేస్తానని కోమటి రెడ్డి హామీ ఇచ్చారు.
కోమటి రెడ్డిని కలిసిన వారిలో తెలుగు చలన చిత్ర వాణిజ్య మండలి అధ్యక్షుడు, నిర్మాత దిల్ రాజు, నిర్మాతలు సురేశ్ బాబు, తుమ్మలపల్లి రామసత్యనారాయణ, దర్శకుడు రాఘవేంద్రరావుతోపాటు ఫిల్మ్ ఛాంబర్ సభ్యులు, ఫిల్మ్ ఫెడరేషన్ నాయకులు సుధాకర్ రెడ్డి, సి.కల్యాణ్ లు ఉన్నారు. అలాగే చిత్ర పరిశ్రమ ఎదుర్కొంటున్న సమస్యల పరిష్కారం కోసం వారు ఈ నెల 21న ముఖ్యమంత్రి రేవంత్ రెడ్డిని కలుస్తారని తెలుస్తోంది.