Summer: శివరాత్రికి శివ శివా అంటూ చలిపోతుందని అంటారు. కానీ, ఈసారి శివరాత్రికంటే ముందే చలి పరారైనట్టు ఉంది. అయితే, కంప్లీట్ గా పోకుండా.. ఉదయం చలి, మధ్యాహ్నం ఎండ మండుతూ.. మిక్స్డ్ వెదర్ కనిపిస్తోంది. ఫిబ్రవరిలోనే ఎండ సుర్రున కాలుతోంది. ఇప్పుడే ఇలా ఉంటే ముందుముందు ఇంకెలా ఉంటుందోననే టెన్షన్ మొదలైంది. ఎందుకంటే.. ఎండ దెబ్బ ఎలా ఉంటుందో అందరికీ తెలిసిందే.
రాత్రివేళలో చలి ఉంటోంది. తెల్లవారుజామున మరింత చలి పెరుగుతోంది. 11 తర్వాత బయటకు వచ్చే వాళ్లకు మాత్రం ఎండ ప్రతాపం తెలిసొస్తోంది. ఇలా డిఫరెంట్ కాక్ టైల్ వెదర్ తో తెలుగు ప్రజలు ఇబ్బందిపడుతున్నారు.
ఇప్పుడిప్పుడే సమ్మర్ స్టార్ట్ అయిపోయింది. ఈ సీజన్ లో ఎండలు మండిపోతాయని వాతావరణ శాఖ చెబుతోంది. అందుకు కారణం.. ‘ఎల్ నినో’. ఈ పేరు వింటేనే జనం హడలిపోతున్నారు గతంలో ఓ ఏడేళ్ల పాటు ‘ఎల్ నినో’ ఎఫెక్ట్ కు ఎండలు మండిపోయి.. వానలు కురవకుండా పోయి.. కరువు తాండవించి.. అబ్బో జనాలంతా ఆగమాగం అయ్యారు. ఆ ఎల్ నినో ఈసారి మళ్లీ వస్తోందనే మాటే కంగారు పెడుతోంది.
ఈ ఏడాది ఊహించిన ‘ఎల్ నినో’ కారణంగా వేసవి కాలం కఠినంగా ఉంటుందని వాతావరణ శాఖ అధికారులు అంచనా వేస్తున్నారు. రుతుపవనాలపై కూడా ఆ ఎఫెక్ట్ పడనుందని చెబుతున్నారు. తెలంగాణ, ఏపీ అంతటా ఎండలు మండిపోతాయని హెచ్చరిస్తున్నారు.