Deccan Mall: హైదరాబాద్లో అలజడి రేపిన సికింద్రాబాద్ డెక్కన్ మాల్ బిల్డింగ్ను కూల్చివేసేందుకు రంగం సిద్ధమైంది. ఈ రోజు సాయంత్రం నుంచి కూల్చివేత పనులను ప్రారంభించనున్నారు. అయితే భవనంలో చిక్కుకున్న మరో ఇద్దరి గురించి స్పష్టత వచ్చాకే కూల్చి వేయాలని అధికారులు ముందుగా భావించారు. ఈలోగా భవనం కూలిపోతే నష్టం భారీగా ఉంటుందని నిపుణులు హెచ్చరించడంతో తిరిగి కూల్చివేయాలని నిర్ణయించారు.
భవనం కూల్చివేస్తున్న సమయంలో పక్కన భవనాలకు ఎటువంటి హాని కలగకుండా అధునాతన యంత్రాలను ఉపయోగించనున్నారు. బిల్డింగ్ చుట్టూ టార్పాలిన్ ఏర్పాటు చేసి కూల్చివేయనున్నారు. భారీ క్రేన్ల సాయంతో జేసీబీలను భవనంపైకి తీసుకెళ్లి డ్రిల్లింగ్ పనులను ప్రారంభించనున్నారు.
అలాగే పక్కనున్న భవనాలు దెబ్బతినకుండా హైడ్రాలిక్ క్రషర్ డిమాలిషన్ విధానంలో బిల్డింగ్ను కూల్చివేయనున్నారు. ఈ యంత్రం ఒకే సారి భవనం కుప్పకూలకుండా, పక్కన బిల్డింగ్లకు ఎటువంటి హాని కలగకుండా కూల్చివేస్తుంది. బిల్డింగ్ కూల్చివేతకు దాదాపు 15 నుంచి 20 రోజుల సమయం పడుతుందని అధికారులు తెలిపారు.