Ravibabu : తన తండ్రి ప్రశాంతంగా కన్నుమూశారని నటుడు చలపతిరావు కుమారుడు రవిబాబు ప్రకటించారు. తన తండ్రి వ్యక్తిత్వం గురించి సినీ ఇండస్ట్రీలో చాలా మంది గొప్పగా చెబుతుంటే ఆనందంగా ఉండేదన్నారు. ఆయనకు ఎన్టీఆర్‌, మంచి భోజనం, జోక్స్‌ అంటే ఎంతో ఇష్టమని చెప్పారు. ఎన్టీఆర్‌తో సినిమాల్లో కలిసి నటించే అదృష్టం తన తండ్రికి దక్కిందన్నారు.

సినీ ఇండస్ట్రీలో ప్రతి ఒక్కరూ నాన్నను ‘బాబాయ్’ అని ముద్దుగా పిలుచుకుంటారని రవిబాబు గుర్తు చేశారు. అందరితో సరదాగా ఉండేవారని చెప్పారు. జోక్స్‌ వేస్తూ మాట్లాడేవారని జ్ఞాపకాలను గుర్తు చేసుకున్నారు. అందుకేనేమో సరదాగా ఎలాంటి నొప్పిలేకుండా ప్రశాంతంగా వెళ్లిపోయారని వివరించారు.తన తండ్రి శనివారం రాత్రి భోజనం చేసేవరకు బాగానే ఉన్నారని, చికెన్‌ బిర్యానీ, చికెన్‌ కూర తిని..ఆ ప్లేట్‌ అలా ఇచ్చి..వెనక్కి వాలిపోయారని రవిబాబు వివరించారు.

అనారోగ్యంతో కొంతకాలంగా నటనకు దూరంగా ఉన్న సీనియర్‌ నటుడు చలపతిరావు.. గుండెపోటుతో మరణించారు. బుధవారం అంత్యక్రియలు నిర్వహిస్తామని ఆయన కుమారుడు రవిబాబు ప్రకటించారు. ఆదివారమే అంత్యక్రియలు చేద్దామనుకున్నామని కానీ తన అక్కలు ఇద్దరూ అమెరికాలో ఉన్నారని తెలిపారు. వాళ్లు మంగళవారం రాత్రికి వస్తారని.. అప్పటివరకు మహాప్రస్థానంలో ఫ్రీజర్ లో చలపతిరావు పార్థీవదేవాహాన్ని ఉంచుతామని చెప్పారు.

Share

• 
• 
• 
• 
• 
•