Medchal-Malkajgiri : మేడ్చల్- మల్కాజ్గిరి జిల్లా పీర్జాదిగూడ మేయర్ జక్కా వెంకటరెడ్డి ఇంట్లో జరిపిన సోదాల్లో.. నోట్ల కట్టలు, చీరల బాక్స్లను పోలీసులు స్వాధీనం చేసుకున్నారు. జక్కా వెంకటరెడ్డి ఇంట్లో భారీగా డబ్బు, చీరలు ఉన్నాయంటూ ఆదివారం రాత్రి కాంగ్రెస్ శ్రేణులు ఆందోళనకు దిగడంతో.. వారిపై బీఆర్ఎస్ కార్యకర్తలు దాడి చేశారు. ఈ సమయంలో పోలీసులు లాఠీఛార్జ్ చేసి ఇరువర్గాలను చెదరగొట్టారు.
గొడవ సద్దుమణిగిన తర్వాత జక్కా వెంకటరెడ్డి ఇంట్లో పోలీసులు సోదాలు చేశారు. ఈ సోదాల్లో నోట్ల కట్టలు, చీరల బాక్సులు గుర్తించారు. వాటిని స్వాధీనం చేసుకున్నారు. మల్లారెడ్డికి ఓటు వేసి భారీ మెజారిటీతో గెలిపించుకుందాం అని ముద్రించి ఉన్న కరపత్రాలు చీరల బాక్సుల్లో కనిపించాయి.
పోలీసుల సోదాలకు ముందే భారీగా డబ్బు, చీరల బాక్సులు అక్కడి నుంచి తరలించారని కాంగ్రెస్ ఆరోపిస్తోంది. తాము ఆందోళనకు దిగిన వెంటనే సోదాలు జరిపి ఉంటే భారీ మొత్తంలో డబ్బు దొరికేదని కాంగ్రెస్ నేతలు చెబుతున్నారు. సోదాలు ఆలస్యం కావడం వల్లే మల్లారెడ్డికి చెందిన నోట్ల కట్టల్ని మాయం చేశారని ఆరోపిస్తున్నారు.
.
.