DGP: డిసెంబర్ 31న డీజీపీ మహేందర్ రెడ్డి పదవీ విరమణ చేయనున్నారు. ఆయన స్థానంలో ఇంచార్జి డీజీపీగా అంజనీకుమార్ ను నియమించింది ప్రభుత్వం. ఇక ఆయన్నే పూర్తిస్థాయి డీజీపీగా చేస్తారంటున్నారు. మరి, మహేందర్ రెడ్డిని ఏం చేస్తారు?

ఇటీవల హైదరాబాద్ లో పోలీస్ కమాండ్ సెంటర్ ఓపెనింగ్ సందర్భంగా సీఎం కేసీఆర్ ఆసక్తికర వ్యాఖ్యలు చేశారు. కమాండ్ సెంటర్ కోసం డీజీపీ మహేందర్ రెడ్డి బాగా శ్రమించారని.. ఈ యేడాది చివర్లో ఆయన రిటైర్ అవుతారని.. కానీ, ఆయన్ను అంత ఈజీగా వదిలిపెడతామా? అని కేసీఆర్ అన్నారు. ఆ వ్యాఖ్యలపై అప్పట్లోనే రకరకాలుగా ప్రచారం జరిగింది. మహేందర్ రెడ్డి పదవీకాలం పెంచుతారని.. ఆయన్నే డీజీపీగా కొనసాగిస్తారని.. వార్తలు వచ్చాయి. కానీ, తాజాగా ఇంఛార్జి డీజీపీగా అంజనీకుమార్ ను నియమిస్తూ ప్రభుత్వం ఉత్తర్వులు జారీ చేయడంతో.. ఇక మహేందర్ రెడ్డి పదవిని పొడిగించే ఛాన్స్ లేదని తేలిపోయింది.

మరి, ఆయన్ను అంత ఈజీగా వదిలేస్తామా? అన్న కేసీఆర్ కామెంట్ల వెనుక మర్మం ఏంటనే చర్చ ఇప్పుడు మొదలైంది. డీజీపీ కొనసాగింపు లేకపోతే.. ఇక అదేనా అనే ప్రచారం జరుగుతోంది. మహేందర్ రెడ్డి బీఆర్ఎస్ లో చేరుతారంటూ టాక్.

అవును, మహేందర్ రెడ్డి.. సీఎం కేసీఆర్ కు అత్యంత నమ్మకస్తులుగా ఉన్నారు. ప్రభుత్వం అప్పగించిన బాధ్యతలన్నీ సక్రమంగా నిర్వహించారు. మహేందర్ రెడ్డిపై కేసీఆర్ కు బాగా గురి కుదిరింది. ఆయనకు కావాలసింది ఇలాంటి నమ్మకస్తులే. అందుకే, మహేందర్ రెడ్డిని బీఆర్ఎస్ లోకి ఆహ్వానించారని.. ఆయన సైతం ఓకే అన్నాకే.. ఇంచార్జి డీజీపీని ప్రకటించారని అంటున్నారు.

ఐఏఎస్, ఐపీఎస్ లు పదవీ విరమణ తర్వాత రాజకీయ పార్టీల్లో చేరడం కొత్తేమీ కాదు. గతంలో అనేక ఉదాహరణలు ఉన్నాయి. ఇటీవల సిద్దిపేట కలెక్టర్ వెంకట్రామిరెడ్డి అయితే ఏకంగా రాజీనామా చేసి మరీ గులాబీ కండువా కప్పేసుకున్నారు. ఆ తర్వాత ఎమ్మెల్సీ అయ్యారు. ప్రస్తుత డీహెచ్ శ్రీనివాస్ సైతం ఎప్పుడెప్పుడు బీఆర్ఎస్ లో చేరిపోదామా.. పాలేరు నుంచి ఎమ్మెల్యేగా పోటీ చేద్దామా అని తెగ ఉత్సాహం ప్రదర్శిస్తున్నారు. ఇలాంటి ఉద్యోగులకే అంత ప్రాధాన్యం లభిస్తే.. ఇక డీజీపీగా చేసి, కేసీఆర్ దగ్గర మంచి ఇంప్రెషన్ కొట్టేసిన మహేందర్ రెడ్డి బీఆర్ఎస్ లో చేరడమనేది ఆశ్చర్యపోవాల్సిన విషయమే కాదంటున్నారు. తెలియాల్సిందల్లా.. ఆయనకు పార్టీలో ఏ పదవి కట్టబెట్టబోతున్నారు? ఎంపీ టికెట్ ఇస్తారా? లేదంటే, ఎమ్మెల్యేగా గెలిపించుకుంటారా? గెలిస్తే మంత్రి పదవి కూడా ఖాయమా? అనేదే డిస్కషన్ పాయింట్.

Share

• 
• 
• 
• 
• 
•