బంగాళాఖాతంలో అల్పపీడనం ఏర్పడే అవకాశం ఉందని వాతావరణ శాఖ ప్రకటించింది. ఇది ఉత్తర బంగాళాఖాతం, దాని పరిసర ప్రాంతాల్లో ఈ నెల 18న ఏర్పడుతుందని తెలిపింది. ఇప్పటికే ఏర్పడిన ఉపరితల ఆవర్తనం సముద్ర మట్టం నుంచి సగటున 4.5 కిలోమీటర్ల నుంచి 7.6 కిలోమీటర్ల ఎత్తు మధ్య కొనసాగుతోంది. ఆ ఆవర్తన ప్రభావంతో ఈ నెల 18న ఉత్తర బంగాళాఖాతంలో అల్పపీడనం ఏర్పడుతుందని వాతావరణశాఖ వివరించింది.
అల్పపీడన ప్రభావంతో తెలంగాణలో పలుచోట్ల తేలికపాటి నుంచి మోస్తరు వర్షాలు కురిసే అవకాశం ఉందని వాతావరణశాఖ అధికారులు తెలిపారు. ఈ నెల 20 నుంచి వర్షాలు ఎక్కవగా పడతాయని వెల్లడించారు. ఆగస్టులో తెలంగాణవ్యాప్తంగా వర్షాలు సరిగా కురవలేదు.
జూలైలో సాధారణం కంటే అత్యధిక వర్షపాతం నమోదైంది. ఈ వర్షాకాల సీజన్లో ప్రస్తుతానికి 47.5 సెంటీమీటర్ల వర్షపాతం నమోదు కావాలి. ఇప్పటికే 58.37 సెంటీమీటర్ల సగటు వర్షపాతం రికార్డైంది.
తెలంగాణలో ఆగస్టు మూడో వారం నుంచి వర్షాలు ఎక్కువగా కురుస్తాయమని వాతావరణ శాఖ అధికారులు అంచనా వేస్తున్నారు. ఈ నెల చివరి వారంలో రాష్ట్రంలోని చాలా ప్రాంతాల్లో భారీ వర్షాలు, కొన్నిచోట్ల అతిభారీ వర్షాలు కురుస్తాయని ఐఎండీ అంచనా వేస్తోంది.