Rain: తెలంగాణ రాష్ట్రవ్యాప్తంగా తీవ్ర అల్పపీడనం ప్రభావం కనిపిస్తోంది. వచ్చే నాలుగు రోజులు భారీ వర్షాలు పడతాయని వాతావరణశాఖ చెబుతోంది. మంగళ, బుధ, గురువారాల్లో కొన్ని జిల్లాలకు రెడ్ అలర్ట్ జారీ చేసింది. ఉపరితల ఆవర్తనం కారణంగా గత ఐదు రోజుల నుంచి కురుస్తున్న వర్షాలకు రాష్ట్రవ్యాప్తంగా 29 సెంటీమీటర్ల వర్షపాతం నమోదైంది.
బుధవారం హైదరాబాద్లో భారీ, అతి భారీ, అత్యంత భారీ వర్షాలు కురుస్తాయని వాతావరణశాఖ అలర్ట్ చేసింది. ఉరుములు, మెరుపులతో కూడిన వర్షం పడే అవకాశం ఉందని తెలిపింది. ప్రజలు అప్రమత్తంగా ఉండాలని.. అత్యవసరమైతే తప్ప ఎవరు బయటకు రావద్దని చెబుతోంది. ప్రయాణాలు ఉంటే వాయిదా వేసుకోవాలని కోరింది. వర్షాల వల్ల తలెత్తే పరిస్థితుల్ని ఎదుర్కొనేందుకు DRF, GHMC సిబ్బందిని అలర్ట్ చేసింది ప్రభుత్వం.
భాగ్యనగరంపై వరుణుడు పగ పట్టినట్టున్నాడు. ఎడతెరపి లేని వర్షాలతో మహానగరం తడిసి ముద్దయింది. లోతట్టు ప్రాంతాలు నీట మునిగాయి. ట్రాఫిక్ జామ్లతో నగరవాసులు నరకం చూశారు. కాస్త కూడా గ్యాప్ ఇవ్వకుండా.. ప్రతీరోజూ వాన దంచికొడుతోంది. ఉదయం ఎండగా ఉందని బయటకు వస్తే.. సాయంత్రానికల్లా వాన కుమ్మేస్తోంది. ఇక అంతే. హైదరాబాద్ ఆగమాగం. ఇప్పటికే వారం గడిచేసింది. ఇంకా 4 రోజులు వానలు ఉంటాయని అంటుండటంతో.. వామ్మో అని హడలిపోతున్నారు హైదరాబాదీలు.