University Rankings :సెంటర్ ఫర్ వరల్డ్ యూనివర్సిటీ ర్యాంకింగ్స్ –2023లో తెలంగాణ నుంచి రెండు యూనివర్సిటీలు చోటు దక్కించుకున్నాయి. టాప్ 2 వేల యూనివర్సిటీల్లో దేశం నుంచి 64 విశ్వవిద్యాలయాలు ఉన్నాయి. తెలంగాణ నుంచి యూనివర్సిటీ ఆఫ్ హైదరాబాద్ 1,265వ ర్యాంకు, ఐఐటీ–హైదరాబాద్ 1,373వ ర్యాంకు దక్కించుకున్నాయి.
గతేడాదితో పోలిస్తే హెచ్సీయూ 7 ర్యాంకులు తగ్గింది. ఐఐటీ–హైదరాబాద్ ర్యాంకు మాత్రం మెరుగైంది. 68 స్థానాలుపైకి ఎగబాకింది. దేశంలో ఐఐటీ–అహ్మదాబాద్ 419 ర్యాంకుతో టాప్లో ఉంది. ఆ తర్వాత స్థానాల్లో ఇండియన్ ఇన్స్టిట్యూట్ ఆఫ్ సైన్స్, ఐఐటీ–మద్రాస్ ఉన్నాయి.
వరల్డ్ టాప్ వర్సిటీల్లో హార్వర్డ్ యూనివర్సిటీ నంబర్వన్గా ఉంది. విద్య నాణ్యత, ఉపాధి, అధ్యాపకుల బోధన, పరిశోధన పనితీరు ఆధారంగా ఈ ర్యాంకులను ప్రకటించారు. పరిశోధనల్లో వెనుకబడటంతోపాటు నిధుల కేటాయింపుల్లో నిర్లక్ష్యం కారణంగా దేశ యూనివర్సిటీలు వెనకబడ్డాయని సీడబ్ల్యూయూఆర్ నివేదిక వెల్లడించింది.
దేశంలోని అత్యుత్తమ విశ్వవిద్యాలయాల్లో ఒకటిగా హైదరాబాద్ సెంట్రల్ యూనివర్సిటీ ఘనత సాధించింది. ‘ది వీక్ హన్సా’ పరిశోధన సర్వే–2023లో దేశంలోని టాప్ 85 మల్టీ డిసిప్లినరీ వర్సిటీల్లో రాష్ట్ర, సెంట్రల్, ప్రైవేట్, డీమ్డ్ వర్సిటీల్లో హెచ్సీయూ నాల్గోస్థానంలో ఉంది. 2022లో ఐదో స్థానంలో ఉండగా.. ఈ ఏడాది ఒక స్థానం పైకి ఎగబాకింది. దక్షిణాదిలోని టాప్ మల్టీ డిసిప్లినరీ విశ్వవిద్యాలయాల్లో మొదటి స్థానం సాధించింది.