Hyderabad: పెద్ద ఎన్టీఆర్ ఉన్నప్పటి నుంచీ ఆ నెంబర్ అంటే ఫుల్ క్రేజీ. ఎన్టీఆర్‌కు 9 లక్కీ నెంబర్. అందుకే ఆయన వాహనాలకు 9999 నెంబర్ ఉండేది. అదే అలవాటును జూనియర్ ఎన్టీఆర్ కూడా కొనసాగిస్తూ వస్తున్నారు. తారక్‌కు ఉన్న ప్రతీ కారుకూ 9999 నెంబరే ఉంటుంది. ఎంత ఖర్చు చేసైనా.. రవాణా శాఖ నిర్వహించే ఫ్యాన్సీ నెంబర్ వేలంలో 9999 ను సొంతం చేసుకునేవారు. ఎన్టీఆర్ అనే కాదు.. చాలామందికి 9 లక్కీ నెంబర్‌గా ఉంటుంది. లక్కీ నెంబర్ కాకపోయినా.. అదో ఫ్యాన్సీ నెంబర్. తమ కారుకు 9999 నెంబర్ ఉందంటే.. అదో స్టేటస్ సింబల్. అందుకే, ప్రతీసారీ యాక్షన్‌లో ఆ నెంబర్‌కు ఫుల్ డిమాండ్. ఈసారి కూడా అలానే జరిగింది.

తెలంగాణ రవాణాశాఖ నిర్వహించిన వేలంలో TS 09 GC 9999 నెంబర్‌ను ఏకంగా రూ.21,60,000లకు సొంతం చేసుకున్నారు. ప్రైమ్ సోర్స్ గ్లోబల్ సర్వీసెస్ ప్రైవేట్ లిమిటెడ్ కంపెనీ ఈ నెంబర్‌ కోసం ఇంత మొత్తాన్ని చెల్లించింది.

TS 09 GD 0009 నెంబర్ సైతం మంచి ధరే పలికింది. మేఘా ఇంజనీరింగ్ అండ్ ఇన్‌ఫ్రాస్టక్చర్స్ సంస్థ 10 లక్షల 50 వేలకు ఈ నెంబర్ చేజిక్కించుకుంది.

TS 09 GD 0001కు రూ.3,01,000.. TS 09 GD 0006కు రూ.1,83,000.. TS 09 GD 0045 నెంబర్‌కు రూ.1,55,000.. TS 09 GD 0007కు రూ.1,30,000.. TS 09 GD 0027కు అత్యల్పంగా వేలం పాటలో రూ.1,04,999 ధర పలికింది.

మొత్తంగా ఫ్యాన్సీ నెంబర్ల వేలంతో తెలంగాణ రవాణాశాఖకు ఒక్కరోజే ఏకంగా రూ.53,34,894ల భారీ ఆదాయం వచ్చింది. కోట్లు పెట్టి లగ్జరీ కార్లు కొనేవాళ్లు.. ఫ్యాన్సీ నెంబర్ కోసం ఈమాత్రం ఖర్చు చేయడం కామనే అంటున్నారు.

Share

• 
• 
• 
• 
• 
•