Delhi Liquor Scam: ఢిల్లీ లిక్కర్ స్కాం లింకులు ఎక్కడెక్కడికో దారి తీస్తున్నాయి. ఇప్పటికే శరత్ చంద్రారెడ్డిని ఈడీ అరెస్ట్ చేయగా.. లేటెస్ట్ గా ఆయన భార్య కనికా టేక్రివాల్ ను ప్రశ్నించారు ఈడీ అధికారులు. జెట్ సెట్ గో విమానసంస్థను నడిపిస్తున్నది కనికానే కావడం.. ఆ విమానాల్లోనే లిక్కర్ స్కాం నిందితులు, పలువురు తెలుగు రాష్ట్రాల ప్రముఖులు ప్రయాణించడం.. డబ్బు కూడా ఆ విమానాల్లోనే తరలించారనే అనుమానంతో.. కనిక నుంచి ఈడీ కీలక సమాచారం రాబట్టే ప్రయత్నం చేసింది.
చార్టెడ్ విమానాలు నడిపే జెట్ సెట్ గో సంస్థకు, లిక్కర్ స్కాంకు బలమైన లింకు ఉన్నట్టు ఈడీ గుర్తించింది. ఇప్పటికే ఆ సంస్థ నడిపిన విమాన సర్వీసుల వివరాలను ఎయిర్పోర్ట్ అథారిటీ ఆప్ ఇండియా నుంచి సేకరించింది. ఆ సమాచారం ఆధారంగా.. జెట్ సెట్ గో ఓనర్ కనికా నుంచి మరిన్ని వివరాలు రాబట్టేందుకు ఈడీ విచారణ జరిపింది. ఏయే తేదీల్లో ఎవరెవరు ప్రమాణించారు? డబ్బు తరలించారా? ఆ విషయం మీకు ముందే తెలుసా? ఇలా పలురకాల ప్రశ్నలు కనికాకు అడిగినట్టు సమాచారం. కనిక ఇచ్చిన ఇన్ఫర్మేషన్ ఢిల్లీ లిక్కర్ స్కాం దర్యాప్తులో కీలకంగా మారే అవకాశం ఉందంటున్నారు.