Mlc Elections : ఇన్నేళ్లూ ఎన్నికలు ఏవైనా విక్టరీ తమదే అన్నట్టుగా ప్రతి ఎన్నికను ప్రతిష్టాత్మకంగా తీసుకుంటూ వచ్చిన బీఆర్ఎస్ ఇప్పుడో సంచలన నిర్ణయం తీసుకుందని సమాచారం. త్వరలో జరగనున్న రెండు ఎమ్మెల్సీ స్థానాల ఉపఎన్నికలకు మాత్రం దూరంగా ఉండాలని నిర్ణయించింది. ఎమ్మెల్యే కోటాలో జరిగే ఈ రెండు ఎమ్మెల్సీ ఎన్నికలు.. ఈ నెల 29న జరగనున్నాయి. ఈ ఎన్నికల్లో పోటీ చేయకూడదని బీఆర్‌ఎస్‌ డిసైడ్ అయిందని తెలుస్తోంది. ఈ నెల 11న ఎన్నికలకు సంబంధించిన నోటిఫికేషన్‌ వెలువడనుంది.

వాస్తవానికి ఈ రెండు స్థానాలు బీఆర్‌ఎస్‌ ఎమ్మెల్సీలు రాజీనామా చేయడం వల్ల ఖాళీ అయినవే. అసెంబ్లీ ఎన్నికల్లో హుజురాబాద్ నుంచి పాడి కౌశిక్‌ రెడ్డి, స్టేషన్ ఘన్ పూర్ నుంచి కడియం శ్రీహరి ఎమ్మెల్యేలుగా గెలిచారు. దీంతో ఈ ఇద్దరు నేతలు ఎమ్మెల్సీ పదవులకు రాజీనామా చేశారు. దీంతో ఎన్నికలు అనివార్యమయ్యాయి. అయితే తగినంత ఎమ్మెల్యేల సంఖ్య లేకపోవడంతో మొత్తానికే ఎన్నికల బరిలోకి దిగకుండా తప్పుకుంటోంది బీఆర్‌ఎస్‌.

విపక్ష పార్టీ ఎన్నికల బరి నుంచి తప్పుకోవడంతో ఎమ్మెల్సీ ఎన్నిక ఏకగ్రీవం కానుంది. ఈ రెండు స్థానాలను కాంగ్రెస్ కైవసం చేసుకోవడం ఇక లాంఛనమే. అయితే ఎవరిని ఎమ్మెల్సీ అభ్యర్థులుగా ప్రకటిస్తారనే ఆసక్తి నెలకొంది.

Share

• 
• 
• 
• 
• 
•