Adulterated Oil : మహబూబ్ నగర్ జిల్లాలో కల్తీ నూనె కలకలం రేపింది. భూత్పూర్ మండలం తాటికొండ సమీపంలో విస్తుపోయే నిజాలు వెలుగుచూశాయి. తాటికొండ శివారులో జంతువుల కళేబరాలతో నూనె తయారు చేస్తున్నారు. కల్తీ నూనెతో పాటు కల్తీ ఎరువులు సైతం తయారు చేయడంతో స్థానికులు ఆందోళన వ్యక్తం చేస్తున్నారు.
కల్తీ నూనె, కల్తీ ఎరువులు తయారు చేసే కంపెనీ నుంచి విషవాయువులు వెలువడటంతో చిన్నారులకు శ్వాసకోస సంబంధిత సమస్యలు తలెత్తుతున్నాయి. ప్రజల ప్రాణాలను కంపెనీ యాజమాన్యం గాలికి వదిలివేసింది. కంపెనీ పరిసర ప్రాంతాల్లో జంతు కళేబరాలను పడేయడంతో దుర్వాసనకు ప్రజలు ఇబ్బందులు పడుతున్నారు. గ్రామస్తులు రోడ్లపైకి వచ్చి ఆందోళన చేసినా.. అధికారులు మాత్రం నిమ్మకు నీరెత్తినట్టు వ్యవహరిస్తున్నారు.
కల్తీ నూనె, కల్తీ ఎరువులు తయారు చేసే కంపెనీని బిగ్ టీవీ పరిశీలించింది. దశలవారీగా జంతు కళేబరాలను ప్రాసెసింగ్ చేసి నూనె పదార్థాలు, కాస్మోటిక్ పదార్థాలను తయారు చేస్తున్న విషయం బయటకు వచ్చింది. జంతు కళేబరాలను పౌడర్గా మార్చి చేపలకు, కోళ్లకు దాణాగా విక్రయిస్తున్నారు. ఇప్పటికైనా అధికారులు చర్యలు తీసుకోవాలని స్థానికులు కోరుతున్నారు.