Virat Kohli: క్రికెట్‌లో ఒక్కొక్క ఫార్మాట్‌కు ఒక్కొక్క విధమైన క్రేజ్ ఉంటుంది. మామూలుగా ప్రేక్షకులకు ఐపీఎల్ లాంటి ఫార్మాట్స్ అంటే ఎక్కువ ఇష్టం. అదే విధంగా మెల్లగా సాగే టెస్ట్ మ్యాచ్‌లకు కూడా ఫ్యాన్స్ ఉంటారు. క్రికెట్‌లోని అసలైన మజా చూడాలంటే టెస్ట్‌లలోనే ఉంటుందని అంటుంటారు. అందుకే చాలామంది క్రికెటర్లకు కూడా టెస్ట్‌లలో ఆడాలనే కోరిక ఉంటుంది. ఇక తాజాగా విరాట్ కోహ్లీ.. టెస్ట్‌లలోకి ఎంటర్ అయ్యి 12 ఏళ్లు అయిన సందర్భంగా సంతోషంగా పోస్ట్ పెట్టాడు.

2011 జూన్ 20న విరాట్ కోహ్లీ తన టెస్ట్ డబ్యూ చేశాడు. తన మొదటి టెస్ట్ జమైకాలోని కింగ్‌స్టన్‌లో వెస్ట్ ఇండీస్‌కు పోటీగా ఆడాడు. ఇప్పటివరకు కోహ్లీ.. 109 టెస్ట్ మ్యాచ్‌లు పూర్తి చేశాడు. అందులో మొత్తంగా 28 సెంచరీలతో అదరగొట్టాడు. కానీ విరాట్.. తన మొదటి మ్యాచ్‌లో మాత్రం సరిగ్గా ఆట కనబరచలేకపోయాడు. రెండు ఇన్నింగ్స్‌లో కేవలం 4,15 పరుగులు మాత్రమే చేయగలిగాడు. ఈ రెండు ఇన్నింగ్స్‌లో పేసర్ ఫీడెల్ ఎడ్వార్డ్స్ చేతిలోనే ఓడిపోయాడు.

మొదటి టెస్ట్‌లో విరాట్ కోహ్లీ ఆటను చూసిన ప్రేక్షకులు.. తను ఈ స్థాయికి ఎదుగుతారని ఊహించకపోయి ఉండవచ్చు. క్రికెటర్‌గా విరాట్ కోహ్లీ జీవితంలో ఎన్నో ఒడిదొడుకులు ఉన్నాయి. ఒక్కసారిగా ఎన్నో రికార్డులు బద్దలుకొట్టిన కోహ్లీ.. కొన్ని సంవత్సరాల పాటు కష్టంగా కెరీర్‌ను కొనసాగించాడు. మళ్లీ కోహ్లీ ఎప్పుడెప్పుడు ఫార్మ్‌లోకి వస్తాడా అని ఎదురుచూసిన ప్రేక్షకుల కోసం తాజాగా జరిగిన ఐపీఎల్‌లో సెంచరీ కొట్టి చూపించాడు. ఇక తను టెస్ట్ మ్యాచ్‌లో 12 ఏళ్లు పూర్తి చేసుకున్న సందర్భంగా ‘టెస్ట్ క్రికెట్‌లో 12 ఏళ్లు. ఎప్పటికీ కృతజ్ఞతతో ఉంటాను’ అని తన ఫోటోతో ట్వీట్ చేశాడు కోహ్లీ.

Share

• 
• 
• 
• 
• 
•