French Open Badminton Final : భారత స్టార్ షట్లర్లు సాత్విక్ సాయిరాజ్-చిరాగ్ శెట్టి సంచలనం సృష్టించారు. ఫ్రెంచ్ ఓపెన్ బ్యాడ్మింటన్ టోర్నీలో డబుల్స్ లో ఫైనల్కు దూసుకెళ్లారు. సెమీస్లో సాత్విక్-చిరాగ్ జోడీ… కొరియా ఆటగాళ్లు చోయ్ సోల్ గ్యు, కిమ్ వాన్ హో జంటపై 21-18, 21-14 పాయింట్ల తేడాతో విజయం సాధించింది. 45 నిమిషాల పాటు సాగిన మ్యాచ్లో సాత్విక్-చిరాగ్ జోడీ ఆద్యంతం ఆధితప్యం ప్రదర్శించింది. ఫైనల్లో చైనీస్ తైపీకి చెందిన లూ చింగ్ యావో-యాంగ్ పో హాన్ జోడీతో లేదా ఇంగ్లాండ్ ద్వయం బెన్ లేన్, సీన్ వెండీలతో తలపడతారు… సాత్విక్, చిరాగ్ శెట్టి.
సాత్విక్-చిరాగ్ జోడీకి ఈ ఏడాది ఇది రెండో బీడబ్ల్యూఎఫ్ వరల్డ్ టూర్ ఫైనల్ మ్యాచ్. గత జనవరిలో ఇండియా ఓపెన్ సూపర్ 500 టోర్నమెంట్లో ఫైనల్ చేరిన సాత్విక్-చిరాగ్ జోడి… టైటిల్ గెలిచింది. ఇప్పుడు మరో బీడబ్ల్యూఎఫ్ వరల్డ్ టూర్ టైటిల్పై కన్నేసింది. ఫ్రెంచ్ ఓపెన్ బ్యాడ్మింటన్ టోర్నీలో ఎనిమిది మంది భారత షట్లర్లు పాల్గొనగా… వీళ్లిద్దరు మాత్రమే ఫైనల్ కు చేరారు. మెన్స్ సింగిల్స్లో కిడాంబి శ్రీకాంత్, సమీర్ వర్మ, ప్రణయ్ ఓడిపోయారు.