Paris Paralympics 2024 Opening Ceremony On Today:  పారిస్ ఒలింపిక్స్ 2024.. ఎన్నో సంచలనాలు, ఎన్నో వివాదాలతో విజయవంతంగా ముగిసింది. మన భారత అథ్లెట్లు 117మంది వెళ్లి, 6 పతకాలతో తిరిగి వచ్చారు. నేడు పారా ఒలింపిక్స్ పోటీలు పారిస్ లో ఘనంగా ప్రారంభం కానున్నాయి.  చారిత్రక సీన్‌నదిపై ఆరంభ వేడుకలతో అదరగొట్టిన పారిస్‌..మరోమారు అక్కడే పారా ఒలింపిక్స్ పోటీలను ప్రారంభించనుంది. సెప్టెంబరు 8న ముగింపు ఉత్సవం జరగనుంది.

ఇప్పటికే నదీ ప్రాంగణమంతా రంగురంగుల లైట్లతో ముస్తాబైంది.  11 రోజుల పాటు సాగనున్న మెగాటోర్నీలో 168 దేశాల నుంచి 4,400 మంది పారా అథ్లెట్లు పాల్గొననున్నారు. మొత్తం 22 క్రీడాంశాల్లో 549 పతకాల కోసం పోటీపడనున్నారు.

మన భారతదేశం నుంచి ఈసారి 84 మంది క్రీడాకారులు బయలుదేరారు. వీరు 12 విభాగాల్లో పతకాల వేట కొనసాగించనున్నారు.  టోక్యో పారాలింపిక్స్‌ (2020)లో ఐదు స్వర్ణాలతో కలిపి, మొత్తం 19 పతకాలు సాధించిన మన అథ్లెట్లు ఈసారి ఆ నెంబర్ ను పెంచాలని పట్టుదలతో ఉన్నారు.

పారాలింపిక్స్‌ ఆరంభ వేడుకల్లో సుమిత్‌ అంటిల్‌, భాగ్యశ్రీ జాదవ్‌ జాతీయ పతాకధారులుగా వ్యవహరించనున్నారు. పారా ఒలింపిక్స్ లో చరిత్రలోనే స్టేడియంలో కాకుండా బహిరంగ ప్రదేశంలో తొలిసారి ప్రారంభోత్సవ వేడుకలు జరగనున్నాయి. ఇకపోతే పారిస్ ఒలింపిక్స్ ఎక్కడ జరిగాయో అక్కడే పారా ఒలింపిక్స్ పోటీలు జరగనున్నాయి.

Also Read: ఇక సెలవు.. ఇంగ్లండ్ స్టార్ క్రికెటర్ డేవిడ్ మలన్

ఐఫిల్ టవర్ సమీపంలో బీచ్ వాలీబాల్ నిర్వహించిన ప్రాంతంలో అంధుల సాకర్ పోటీలు నిర్వహించనున్నారు. మహిళలకు ప్రోత్సాహం ఇవ్వాలనే ఉద్దేశంతో 2020 టోక్యో ఒలింపిక్స్ పోటీలకన్నా మించి మరో 10 కొత్త ఈవెంట్లను చేర్చారు. ఈ నేపథ్యంలో కొత్తగా పారిస్ పారా ఒలింపిక్స్ లో గోల్ బాల్, బోచా ఆటలు ఆసక్తిని రేకెత్తిస్తాయని అంటున్నారు.

ఎప్పటిలాగే చైనా ఈసారి కూడా సత్తా చాటాలని చూస్తోంది. టోక్యో పారా ఒలింపిక్స్ లో 96 స్వర్ణాలతో అగ్రస్థానంలో నిలిచింది. ఈసారి అదే రీతిలో రికార్డును కాపాడుకోవాలని చూస్తోంది. ఇక వీటితో పాటు అదిరే ప్రదర్శనలు, అద్భుత విన్యాసాలు ఉండనున్నాయని అంటున్నారు.

Share

• 
• 
• 
• 
• 
•