Asian Champions Trophy 2024: ఆసియా హాకీ చాంపియన్‌గా భార‌త్: ఒకప్పుడు భారతదేశంలో హాకీ ఆటకు స్వర్ణయుగంగా ఉండేది. తర్వాత కాలక్రమంలో అలా వెనుకపడిపోయింది. కానీ ఇప్పుడా రోజులు మళ్లీ వచ్చాయన్న రీతిలో భారత హాకీ క్రీడాకారులు అద్భుతంగా ఆడుతున్నారు. అందుకు నిదర్శనంగా.. హాకీ ఆసియా ఛాంపియన్స్ ట్రోఫీ-2024ను భారత్ కైవసం చేసుకుంది. హర్మన్‌ ప్రీత్ సింగ్ నేతృత్వంలోని భారత్ ఆద్యంతం మెరుపు వేగంతో ఆడింది.

భారత్ కి వ్యతిరేకంగా ఎప్పుడూ కవ్వింపు చర్యలకు పాల్పడే పాకిస్తాన్ దేశం తరహాలోనే చైనా కూడా మారింది. అందుకని ఈ రెండు దేశాలతో జరిగే ఆటలు చాలా ఉద్వేగంగా ఉంటాయి. ప్రజలు కూడా ఎంతో ఉత్కంఠతో చూస్తారు.  ఈ క్రమంలో జరిగిన హాకీ ఫైనల్ మ్యాచ్ లో 1-0 తేడాతో ఆతిథ్య చైనాను భారత్ మట్టి కరిపించింది. ఆసియా ఛాంపియన్ గా అవతరించింది. దీంతో భారత్ లో సంబరాలు అంబరాన్నంటాయి.

ఇక హోరా హోరీగా సాగిన మ్యాచ్ లో.. చివరి క్వార్టర్ లో డిఫెండర్ జుగ్ రాజ్ గోల్ సాధించి భారత్ కి ట్రోఫీ అందించాడు. దీంతో ఆసియా ఛాంపియన్స్ ట్రోఫీని భారత్ వరుసగా రెండోసారి నిలబెట్టుకుంది. ఓవరాల్ గా చూస్తే ఇప్పటివరకు ఐదు సార్లు భారత్ ట్రోఫీని గెలిచింది.

Also Read: బంగ్లాదేశ్ ముచ్చట తీరదు.. కెప్టెన్ రోహిత్ శర్మ

చైనాలోని హులున్‌బుయిర్‌లో ఉన్న మోకీ ట్రైనింగ్ బేస్ వేదికగా ఫైనల్ మ్యాచ్ జరిగింది. మొదటి మూడు క్వార్టర్స్‌లో గోల్ సాధించేందుకు భారత ఆటగాళ్లు విపరీతంగా ప్రయత్నాలు చేశారు. ఎన్నో ఎత్తుగడలతో ఎటాకింగ్ ప్లే ఆడారు. అందులో ఏ ఒక్కటీ ఫలించలేదు. చైనా గోల్ కీపర్ వాంగ్ ఫీల్డ్ వాటిని సమర్థవంతంగా అడ్డుకున్నాడు.ఆఖరికి పెనాల్టీ కార్నర్ ను కూడా ఆపేశాడు.

ఈ దశలో చివరి క్వార్టర్‌ వచ్చింది. ఇక్కడ గానీ గోల్ కొట్టకపోతే అంతే సంగతి అనుకొని.. ప్రాణం పెట్టి ఆడారు.  కెప్టెన్ హర్మన్‌ప్రీత్ సింగ్ కి ఒక అవకాశం వచ్చింది. బంతిని అద్భుత రీతిలో తప్పించి డిఫెండర్ జుగ్‌రాజ్‌కి అందించాడు. తను క్షణం కూడా ఆలోచించకుండా.. బ్రహ్మాండమైన స్ట్రయిక్‌‌తో బంతిని కొట్టాడు. అది కళ్లు మూసి తెరిచేలోగా గోల్ పోస్టులోకి వెళ్లిపోయింది. ఈసారి చైనీస్ గోల్ కీపర్‌ ఆపలేకపోయాడు.  అలా ఉత్కంఠకు తెరపడింది. చివరకి భారత్ విజయాన్ని అందుకుంది. ట్రోఫీని ముద్దాడింది.

Share

• 
• 
• 
• 
• 
•