IND vs SL 3rd ODI 2024: శివమ్ దూబె, రాహుల్ పై వేటు? రేపే శ్రీలంకతో మూడో వన్డే

India vs Sri Lanka Dream11 Team Prediction 3rd ODI 2024: శ్రీలంక సిరీస్ కి సీనియర్లందరూ మళ్లీ జట్టులోకి వచ్చారని ఆనందపడిన భారత అభిమానుల ఆశలు అడియాశలయ్యాయి. ఒక్క రోహిత్ శర్మ తప్ప ఎవరూ పెద్దగా ఆకట్టుకోవడం లేదు. తనే రెండు వన్డేల్లో ధనాధన్ ఆడి హాఫ్ సెంచరీలు చేశాడు. అయినా సరే, మిడిలార్డర్ వైఫల్యంతో టీమ్ ఇండియా గెలవాల్సిన మొదటి మ్యాచ్ ని టైగా ముగించింది. రెండో వన్డేలో ఓటమి పాలైంది.

శ్రీలంకపై విరాట్ కొహ్లీకి అద్భుతమైన ట్రాక్ రికార్డ్ ఉంది. ఇప్పటివరకు శ్రీలంకపై 53 వన్డేలు ఆడి.. ఏకంగా 61.2 సగటుతో 2,632 పరుగులు చేశాడు. ఇందులో 10 సెంచరీలు, 12 అర్ధ శతకాలు ఉన్నాయి. కానీ ఎందుకో సిరీస్ లో తేలిపోతున్నాడు. ఇప్పటివరకు రెండు మ్యాచ్‌ల్లో 24, 14 పరుగులు మాత్రమే చేశాడు.

జట్టులో వన్డే మ్యాచ్ లకి అతికినట్టు సరిపోయే కేఎల్ రాహుల్ సైతం చేతులెత్తేస్తున్నాడు. ఇక శ్రేయాస్ అయ్యర్ ఎప్పుడు ఆడతాడో తెలీడం లేదు. తను క్రీజులోకి వచ్చి వార్మప్ చేసినంత సేపు ఉండటం లేదు. గౌతం గంభీర్ ఆశీస్సులు ఉన్నంతవరకు తన స్థానానికి ఢోకా లేకపోవచ్చు.

రేపు బుధవారం శ్రీలంకతో కొలంబో ప్రేమదాస స్టేడియంలో జరగనున్న మూడో వన్డేకు రెండు మార్పులు చేసే యోచనలో టీమ్ ఇండియా ఉంది. ముఖ్యంగా శివమ్ దూబె, కేఎల్ రాహుల్ ను తప్పించనున్నారని అంటున్నారు. వారి ప్లేస్ లో రియాన్ పరాగ్, రిషబ్ పంత్ వస్తారని చెబుతున్నారు.

Also Read: ఒలింపిక్స్ లో నేడు భారత షెడ్యూల్..

ఈ మ్యాచ్ టీమ్ ఇండియాకు కీలకంగా మారనుంది. ఎందుకంటే గెలవక తప్పని పరిస్థితిలో ఉంది. గెలిస్తే సిరీస్ ను సమం చేసి, పరువు కాపాడుకుని ఇండియాకు తిరుగు ముఖం పడుతుంది. లేదంటే సిరీస్ ఓటమితో, అవమాన భారంతో సీనియర్లందరూ తలదించుకుని, పతనావస్థలో ఉన్న శ్రీలంక జట్టుతో ఓడిపోయిన కీర్తిని మూటగట్టుకుని ఇండియాకు బయలుదేరుతారు.

ఇది కొత్త కోచ్ గౌతం గంభీర్ కు సవాల్ గా మారింది. ఇక్కడ కానీ సీనియర్లు సరిగ్గా పెర్ ఫార్మెన్స్ చేయకపోతే గంభీర్ కఠిన నిర్ణయాలు తీసుకోడానికి వెనుకాడడని అంటున్నారు. అందుకోసమే పడుకున్నవాళ్లని పిలిచి మరీ ఆడిస్తున్నాడని కొందరంటున్నారు.