Australia Vs India ICC Under-19 World Cup Final : అండర్ 19లో కుర్రాళ్లు దుమ్ము దులిపి మళ్లీ ఫైనల్స్లో చేరారు. ఆదివారం సౌతాఫ్రికాలోని విల్లోమూర్ పార్క్ బెనోనిలో జరగనుంది. ఇప్పటివరకు టీమ్ ఇండియా యువ జట్టు ఐదుసార్లు విశ్వ విజేతగా నిలిచింది. ఫైనల్లో తలపడనున్న ఆస్ట్రేలియా మూడు సార్లు ప్రపంచ కప్ కొట్టింది. ఈ లెక్కన చూస్తే ఆస్ట్రేలియాను టీమ్ ఇండియా తేలికగా తీసుకోకూడదని సీనియర్లు వ్యాక్యానిస్తున్నారు.
ఇంతవరకు అండర్ 19 టోర్నమెంట్లో టీమ్ ఇండియా యువ జట్టు ఒక్క మ్యాచ్ కూడా ఓటమి అన్నదే ఎరగకుండా ఫైనల్కి చేరింది. భారీ రన్స్ తేడాతో లీగ్ దశలో గెలిచినప్పటికీ.. సెమీఫైనల్లో మాత్రం తడబడింది. చివరకు దాస్, కెప్టెన్ ఉదయ్ ఇద్దరూ సమయోచితంగా ఆడి మ్యాచ్ను విజయ తీరాలకు చేర్చారు. హమ్మయ్యా అని ఊపిరి పీల్చుకున్నారు.
Read More: SL vs AFG: నిస్సంక డబుల్ సెంచరీ.. ఆఫ్గనిస్తాన్పై లంక ఘనవిజయం..
ఆస్ట్రేలియా అయితే టోర్నీ ఆసాంతం తడబడుతూనే గెలుస్తూ వచ్చింది. పాకిస్తాన్తో జరిగిన మ్యాచ్లో ఆఖరి ఓవర్ వరకు విజయం దోబుచులాడుతూనే ఉంది. ఎట్టకేలకు 3 రన్స్ 6 బాల్స్ చేయాల్సిన పరిస్థితుల్లో ఒక ఫోర్ రావడంతో చచ్చీచెడి ఫైనల్లో అడుగు పెట్టింది.
ఈ లెక్కన, అంకెలన్నీ చూస్తే ప్రస్తుతం టైటిల్ ఫేవరెట్ భారత్ లాగే కనిపిస్తోంది. అంతేకాదు ఒత్తిడిలో నుంచి కూడా ఒడ్డున పడగలదని సెమీఫైనల్ మ్యాచ్లో నిరూపించింది. అందువల్ల కచ్చితంగా టీమ్ ఇండియా ఆరోసారి కూడా కప్ గెలిచి విజయ ఢంకా మోగిస్తుందని క్రీడా విశ్లేషకులు వ్యాక్యానిస్తున్నారు.
జట్టు సమీకరణాలు, ఆటగాళ్ల సెంచరీలు, విజయాలు ఇలాంటి లెక్కలు, ఆటలో ఎలాంటి పరిస్థితులు వచ్చినా ఆఖరి వరకు పోరాడటమే కంగారుల నైజం. 2023 వన్డే వరల్డ్ కప్లో సీనియర్ జట్టుకి తగిలిన గాయం ఎవరూ మరిచిపోలేనిది. మరొక్కసారి ఆస్ట్రేలియా-ఇండియా యువ జట్టు కూడా తలపడటంతో ఆ చేదు జ్నాపకాన్ని అందరూ గుర్తు చేసుకుంటున్నారు. ఈసారి మరీ కుర్రాళ్లు ఆ కోరిక తీర్చి, భారతీయులకు ఒక బహుమతినిస్తారా? అనేది వేచి చూడాల్సిందే.