Woman Slaps MLA : ప్రజా ప్రతినిధులు ఉన్నదే ప్రజల సమస్యలు తీర్చడానికి. తమ గోడు పట్టించుకుంటారనే కదా ఓటేసి వారిని ఎన్నుకునేది. అలాంటి నేతలు.. కష్ట సమయాల్లో ప్రజలవైపు చూడకపోతే ఎంత కోపం వస్తుంది. ఆవేశం కట్టలు తెచ్చుకుంటుంది కదా. హర్యానాలో ఓ లేడీ అలానే చేసింది. అంతా అయిపోయాక వరద ప్రభావిత ప్రాంతాన్ని పరిశీలించడానికి వెళ్లిన ఎమ్మెల్యే చెంప చెల్లుమనిపించింది. తమ ఊరంతా వరద నీటిలో మునిగిపోతే.. తీరిగ్గా ఇప్పుడు ఎందుకు వచ్చావ్ అంటూ ఆగ్రహం వ్యక్తం చేసి, చెంపపై కొట్టింది. దీంతో చేసేదేం లేక ఆ ఎమ్మెల్యే అక్కడి నుంచి మెల్లగా వెనుతిరిగాడు.
భారీ వర్షాలతో హర్యానాలో ఘగ్గర్ నది ఉధృతంగా ప్రవహిస్తోంది. భారీ వరదలతో చుట్టుపక్కల ప్రాంతాలన్నీ నీటమునిగాయి. నాలుగు రోజుల పాటు ప్రజలు చాలా ఇబ్బందులు పడ్డారు. కానీ స్థానిక ఎమ్మెల్యే అప్పుడు వారి వైపే చూడలేదు. తిరిగ్గా ఆ ప్రాంతాన్ని పరిశీలించడానికి వెళ్లారు జననాయక్ జనతా పార్టీ ఎమ్మెల్యే ఈశ్వర్ సింగ్. ఇండ్లు నీట మునిగి దిక్కుతోచని స్థితిలో ఉన్న ప్రజలు.. తమను ఎవరూ పట్టించుకోలేదనే కోపంతో ఉన్నారు. ఎమ్మెల్యే తమ ప్రాంతానికి వెళ్లడంతో అతడిని చుట్టముట్టారు. వారిలో ఓ మహిళ కోపంతో ఎమ్మెల్యే చెంపపై ఒక్కటేసింది. ఇక్కడేముందని చూడటానికి వచ్చావంటూ నిలదీసింది. ఆ మహిళ కోపానికి తట్టుకోలేకపోయిన ఎమ్మెల్యే.. మెల్లగా అక్కడి నుంచి జారుకున్నారు.