Salman Khan (Bollywood News) : సెలబ్రిటీలను చంపేస్తామని బెదిరించడం ఫ్యాషన్ గా మారిపోయింది. గతంలో చాలా మంది బాలీవుడ్ హీరోలకు ఇలాంటి బెదిరింపులు వచ్చాయి. అలాగే విమానంలో బాంబు ఉంది. రైలులో పేలుడు పదార్థాలున్నాయి అంటూ ఆగంతకులు పోలీసులకు ఫోన్ చేసిన ఘటనలు ఈ మధ్య కాలంలో పెరిగిపోయాయి. ఇలాంటి సందర్భాల్లో అత్యవసరంగా విమానాలను ల్యాండింగ్ చేసి తనఖీలు చేపడుతున్నారు. రైళ్లను నిలిపివేసి పోలీసులు పరిశీలిస్తున్నారు.
తాజాగా బాలీవుడ్ స్టార్ హీరో సల్మాన్ ఖాన్కు బెదిరింపులు వచ్చాయి. సోమవారం రాత్రి ఓ వ్యక్తి ముంబై పోలీస్ కంట్రోల్ రూమ్కు ఫోన్ చేశాడు. సల్మాన్ను చంపేస్తామని బెదిరించాడు. సోమవారం రాత్రి 9 గంటలకు గుర్తు తెలియని వ్యక్తి ఫోన్ చేసి సల్మాన్ను ఏప్రిల్ 30లోపు చంపేస్తామని బెదిరించినట్లు పోలీసులు వెల్లడించారు. ఈ ఫోన్ కాల్ తో పోలీసులు అప్రమత్తమయ్యారు. ఈ ఫోన్ ఎక్కడ నుంచి వచ్చింది..? ఎవరు చేశారు? అనే విషయాలపై దర్యాప్తు చేపట్టారు.. రాకీ భాయ్ పేరుతో దుండగుడు ఫోన్ చేసినట్లు పోలీసులు చెప్పారు.
సల్మాన్ కు నెలరోజుల వ్యవధిలో రెండోసారి బెదిరింపులు రావడం కలకలం రేపుతోంది. మార్చి 18న గ్యాంగ్స్టర్ లారెన్స్ బిష్ణోయ్ గ్యాంగ్ నుంచి ఈ-మెయిల్ ద్వారా బెదిరింపులు వచ్చాయి. ఈ విషయంపై ముంబై బాంద్రా పోలీసులకు సల్మాన్ టీమ్ ఫిర్యాదు చేసింది. ఇలా వరుసగా బెదిరింపులు రావడంతో ముంబై పోలీసులు సల్మాన్ భద్రతపై మరింత దృష్టి పెట్టారు. ప్రస్తుతం సల్మాన్ ‘కిసీ కా భాయ్ కిసీ కీ జాన్’లో నటిస్తున్నారు. తాజాగా ఈ సినిమా ట్రైలర్ కూడా విడుదలైంది.