Chandrayaan 3 Updates(Latest Updates from ISRO) : జాబిల్లికి మరింత దగ్గరైంది చంద్రయాన్-3 ల్యాండర్. ఇప్పటికే ప్రొపల్షన్ మాడ్యూల్ నుంచి ల్యాండర్ మాడ్యుల్ విక్రమ్ ను వేరు చేయగా.. తాజాగా విక్రమ్ ల్యాండర్ కక్ష్యను విజయవంతంగా తగ్గించారు. ఇంధనాన్ని మండించి చంద్రుడికి మరింత దగ్గరగా ఉన్న కక్ష్యలో ల్యాండర్ను పంపారు. మొదటి డీబూస్టింగ్ విజయవంతమైందని ఇస్రో ప్రకటించింది. తర్వాత డీబూస్టింగ్ను ఈ నెల 20న తెల్లవారుజామున రెండు గంటలకు నిర్వహిస్తామని ఇస్రో ప్రకటించింది.
ఇదే సమయంలో జాబిల్లికి సంబంధించిన లెటెస్ట్ వీడియోను ఇస్రోకు పంపింది విక్రమ్. ల్యాండర్ పోసిషన్ డిటెక్షన్ కెమెరాతో చంద్రుడి వీడియోను తీయగా.. దానిని ఇస్రో కమాండ్ సెంటర్కు పంపింది విక్రమ్. ఈ వీడియోను ఇస్రో రిలీజ్ చేసింది. ఇండిపెండెన్స్ డే రోజు ఈ వీడియోను రికార్డ్ చేసింది చంద్రయాన్-3.
ప్రస్తుతం విక్రమ్ ల్యాండర్ను డీబూస్ట్ చేసే పనిలో ఉన్నారు ఇస్రో సైంటిస్టులు. 30 కిలోమీటర్ల పెరిలూన్.. 100 కిలో మీటర్ల అపోలూన్ ఉన్న కక్ష్యలో దాని స్థానం కోసం డీబూస్ట్ అంటే ల్యాండర్ ను స్లో చేయడం మొదలుపెట్టారు. ఈ ల్యాండర్ ఆగస్టు 23 సాయంత్రం చంద్రుడి దక్షిణ ధ్రువంపై దిగే అవకాశం ఉంది. ఆ తర్వాత ల్యాండర్ నుంచి రోవర్ బయటకు వస్తుంది. చంద్రుడిపే పరిశోధనలు చేస్తోంది. ఈ ప్రయోగం విజయవంతం అయితే చంద్రుడి పైకి ల్యాండర్, రోవర్ పంపిన నాలుగో దేశంగా భారత్ రికార్డు సృష్టిస్తుంది. ఇప్పటికే సోవియట్ యూనియన్, అమెరికా, చైనా చంద్రుడి పైకి రోవర్లను పంపాయి.