College: ప్రేమ అనేది ఎప్పుడు ఎలా పుడుతుందో ఎవరికీ తెలియదు. ముఖ్యంగా కాలేజీ రోజుల్లో ఎక్కువ మంది ప్రేమలో పడుతుంటారు. కాలేజీకి వెళ్లడం మానేసి సినిమాలకు, పార్క్లకు వెళ్లే వారు చాలా మంది ఉంటారు. అయితే ఇటువంటి సంఘటనలు జరగకుండా కాలేజీ యాజమాన్యాలు చర్యలు తీసుకుంటుంటాయి. ఫిబ్రవరి 14.. ప్రేమికుల రోజు వస్తుండడంతో ఓ కాలేజీ తరుపు రిలీజ్ అయిన నోటీసు ప్రస్తుతం సోషల్ మీడియాలో వైరలవుతోంది.
‘‘కళాశాలలో చదవుతున్న ప్రతి ఒక్క అమ్మాయి ప్రేమికుల దినోత్సవం రోజుకల్లా బాయ్ఫ్రెండ్తో కనిపించాలి. లేదంటే కాలేజీలోకి అనుమతించబోము’’ అంటూ ఒడిశాలోని ఎస్వీఎం కాలేజీ పేరిట ఈ నోటీసు రిలీజ్ అయింది. ఆ నోటీస్ సామాజిక మాధ్యమాల్లో వైరల్ కావడంతో కాలేజీపై విమర్శలు వెల్లువెత్తుతున్నాయి. పిల్లల తల్లిదండ్రులు కాలేజీపై మండిపడుతున్నారు.
ఈ వ్యవహారంపై కళాశాల ప్రిన్సిపల్ విజయ్ కుమార్ స్పందించారు. ఈ నోటీస్కి కాలేజీకి ఎటువంటి సంబంధం లేదని, అది ఫేక్ నోటీసని స్పష్టం చేశారు. తన సంతకాన్ని దుర్వినియోగం చేసి, కాలేజీ పరువు తీయడానికి కావాలనే ఫేక్ నోటీసు సృష్టించారని తెలిపారు. విజయ్ కుమార్ ఫిర్యాదు మేరకు పోలీసులు కేసు నమోదు చేశారు. ఫేక్ నోటీస్ సృష్టించిన నిందితుల కోసం గాలిస్తున్నారు.