Chennai Cow Attack : చెన్నైలో నడి రోడ్డుపై ఓ ఆవు బీభత్సం సృష్టించింది. ఆరంబాక్కమ్ లో స్కూల్ నుంచి వస్తున్న ఓ విద్యార్థిని.. కొమ్ములతో కుమ్మి తీవ్రంగా గాయపరిచింది. నేలపై పడేసి.. కాళ్లతో తన్ని.. ముఖంతో కుమ్మి.. అత్యంత దారణంగా చిన్నారిపై దాడి చేసింది.
రెండు ఆవులు దాడి చేసే సమయంలో చిన్నారి తల్లి అక్కడే ఉంది. కానీ, ఏం చేయలేకపోయింది. మందమెక్కిన ఆ ఆవులు పాపను నేలకేసి కుమ్ముతుంటే చూస్తూ ఉండటం మినహా ధైర్యం చేసి దగ్గరకు వెళ్లి అడ్డుకునే పరిస్థితి లేదక్కడ. కాపాడండి అంటూ ఆ తల్లి అరుస్తూ.. కేకలు వేస్తూ.. ఆవును భయపెట్టి తరిమేసే ప్రయత్నం చేసినా ఫలించలేదు.
కాసేపటి తర్వాత.. ఆ తల్లి అరుపులు విన్న స్థానికులు ఆ ఆవును బెదరగొట్టే ప్రయత్నం చేశారు. రాళ్లు, కర్రలతో వాటిని తరిమికొట్టి విద్యార్థిని కాపాడి ఆసుపత్రికి తరలించారు. అప్పటికే ఆవు దాడిలో విద్యార్థిని తీవ్రంగా గాయపడింది. ఆవు దాడికి సంబంధించిన సీసీటీవీ దృశ్యాలు భయం గొలిపేలా ఉన్నాయి.