Assam steps towards Uniform Civil Code: యూనిఫాం సివిల్ కోడ్ వైపు అడుగులు వేస్తూ, అస్సాం క్యాబినెట్ శుక్రవారం అస్సాం ముస్లిం వివాహాలు, విడాకుల నమోదు చట్టం, 1935ను రద్దు చేసింది. దీనితో, ముస్లిం వివాహాలు, విడాకులకు సంబంధించిన అన్ని విషయాలు ఇప్పుడు ప్రత్యేక వివాహాల చట్టం పరిధిలోకి వస్తాయి.
శుక్రవారం సీఎం హిమంత బిస్వా శర్మ అధ్యక్షతన కేబినెట్ సమావేశం జరిగింది. ఈ సమావేశంలో ఈ సంచలన నిర్ణయం తీసుకున్నారు.
సమావేశానంతరం మీడియాతో మాట్లాడిన రాష్ట్ర మంత్రి జయంత మల్లబారువా, యూసీసీ సాధించే దిశగా ఇదొక ముందడుగు అని పేర్కొన్నారు.
” యూసీసీ దిశగా వెళ్తున్నామని సీఎం ఇటీవల ప్రకటించారు. ఈ ప్రయాణంలో, చాలా ముఖ్యమైన నిర్ణయం తీసుకున్నాం. 94 ముస్లిం రిజిస్ట్రార్లు ఇప్పటికీ పనిచేస్తున్న అస్సాం ముస్లిం వివాహ & విడాకుల నమోదు చట్టం, 1935ను ఈ రోజు రద్దు చేశాం” అని మల్లబారువా స్పష్టం చేశారు.
Read More: కాశీ మినీ పంజాబ్ను తలపిస్తుంది.. వారణాసి ప్రసంగంలో మోదీ
ఇకపై ముస్లిం వివాహాలు, విడాకుల నమోదును జిల్లా కమిషనర్, జిల్లా రిజిస్ట్రార్ చేపడతారని మంత్రి తెలిపారు.
ఈ చట్టం కింద పనిచేస్తున్న 94 మంది ముస్లిం రిజిస్ట్రార్లను ఒక్కొక్కరికి ఒకేసారి రూ.2 లక్షల చొప్పున పరిహారంతో విధుల నుంచి డిశ్చార్జి చేస్తామని మల్లబారువా ప్రకటించారు.
ఈ నెల ప్రారంభంలో, యూనిఫాం సివిల్ కోడ్ బిల్లును ఆమోదించిన దేశంలోనే మొదటి రాష్ట్రంగా ఉత్తరాఖండ్ నిలిచింది. వివాహం, విడాకులు, వారసత్వం, లివ్-ఇన్ సంబంధాలను నియంత్రించే పాత వ్యక్తిగత చట్టాలను భర్తీ చేయడానికి బిల్లు ప్రయత్నిస్తుంది.