Vasa : అదే పనిగా మాట్లాడే పిల్లలను .. ‘వసపిట్టలా ఎందుకు ఊరికే వాగుతావు?’ అని పెద్దలు విసుక్కోవటం మనకు తెలిసిందే. మాటలు వచ్చే వయసులో చిన్నపిల్లలకి వస పోస్తే మంచిదని మన పెద్దలు చెబుతుంటారు.
వస అనేది ఒక చెట్టు వేరు భాగం. ఆ వసకొమ్ములు ఏ ఆయుర్వేద షాపుల్లోనైనా దొరకుతాయి. ఒక కొమ్మును గంధం తీసే సాన మీద 2, 3 చుక్కల నీరువేసి రుద్ది.. ఆ జిగురు వంటి పదార్థాన్ని చిన్నారులచేత నాకించాలి. దీనినే వసపోయటం అంటారు.
సాధారణంగా 4 నుంచి 6 నెలల పిల్లలకు వస పోస్తారు. రెండు, మూడు సార్లు ఇలా వసపోస్తే చాలు. ఆదివారంగానీ, బుధవారంగానీ ఈ వస కార్యక్రమం చేస్తుంటారు.
ఆదివారంనాడు వస పోస్తే ఆయుష్షు పెరుగుతుందనీ, బుధవారంనాడు పోస్తే మంచి తెలివి అబ్బుతుందని పెద్దలు చెబుతారు.
చిన్నారులకు వసపోయటం వల్ల.. స్వరతంత్రులు (వోకల్ కార్డ్స్) శుభ్రపడి.. స్వరం మెరుగుపడుతుంది. అలాగే.. నాలుక పలుచబడుతుంది.
మెదడులోని నాడులను వస ఉత్తేజితం చేసి.. పిల్లలు చురుగ్గా ఉండేలా చేస్తుంది.
అయితే తగు మోతాదులో మాత్రమే ఇవ్వాలి.