Rasam for Idly Recipe: చాలా మందికి సాంబార్ ఇడ్లీ అంటే ఎంతో ఇష్టం. కానీ.. ఎప్పుడైనా రసం ఇడ్లీ తిన్నారా ? ఛీ అదేంటి.. రసంతో ఇడ్లీ .. అని అనుకుంటున్నారా? చాలా బాగుంటుంది. ఒక్కసారి తిన్నారంటే సాంబార్ ఇడ్లీ కంటే ఇదే బాగుందని చెప్తారు. ఇదే మీ ఫేవరెట్ బ్రేక్ ఫాస్ట్ అవుతుంది కూడా. కావాలంటే ఒక్కసారి ట్రై చేసి చూడండి. అక్కడక్కడా పచ్చికొబ్బరి తురుము తగులుతూ.. పుల్లపుల్లగా వేడి వేడి రసం గొంతులోకి దిగుతుంటే భలే బాగుంటుంది.

రసం తయారీకి కావలసిన పదార్థాలు

టొమాటోలు – 5-6

మునక్కాడ ముక్కలు – 4-5

సన్నగా తరిగిన కొత్తిమీర

పచ్చికొబ్బరి తురుము – 2 స్పూన్లు

రసం/ సాంబారు పొడికి కావలసిన పదార్థాలు

ధనియాలు – 1/4 కప్పు

జీలకర్ర – 1 టేబుల్ స్పూన్

మెంతులు – కొద్దిగా

మిరియాలు – 1 టేబుల్ స్పూన్

ఎండుమిర్చి – గుప్పెడు

బియ్యం- 2 టేబుల్ స్పూన్లు

నూనె – కొద్దిగా

Also Read: బ్యాచిలర్స్ కోసం లంచ్ బాక్స్ రెసిపీ.. నిమిషాల్లో చేసుకోవచ్చు..

రసం తయారీ విధానం

కళాయిలో నూనె వేసి .. వేడయ్యాక రసం పొడి తయారీకి చెప్పిన పదార్థాలు బియ్యం మినహా మిగతా దినుసులన్నీ వేసుకుని పచ్చివాసన పోయేంతవరకూ కరకరలాడేలా వేయించుకోవాలి. చివరిలో బియ్యం కూడా వేసి మాడకుండా వేయించుకుని చల్లారబెట్టుకోవాలి. వీటన్నింటినీ మిక్సీ జార్ లో వేసి, అందులోనే చిటికెడు కల్లుప్పు వేసి మెత్తగా పొడి చేసుకోవాలి. సాంబార్ లోకి కూడా దీనిని వాడుకోవచ్చు.

ఇప్పుడు టొమాటోలను తీసుకుని.. వాటిపై తలలను తీసేసి.. నాలుగువైపులా గాట్లు పెట్టుకోవాలి. ఒక గిన్నె నిండా నీరు పోసి.. అందులో టొమాటోలు, మునక్కాడ ముక్కలు, రుచికి సరిపడా కల్లుప్పు, చిటికెడు పసుపు వేసి బాగా ఉడికించుకోవాలి. ఉడికిన టొమాటోలను నీటిలో నుంచి తీసేసి చల్లారబెట్టుకోవాలి.

టొమాటోలు చల్లారిన తర్వాత తొక్కలను శుభ్రంగా తీసేసి.. మిక్సీ జార్ లో వేసి పేస్ట్ చేసుకోవాలి. ఈ పేస్ట్ ను మరుగుతున్న నీటిలో వేసి మరిగించుకోవాలి. అందులోనే కొబ్బరి తురుము, కొత్తిమీర, 2 స్పూన్లు తయారు చేసుకున్న రసంపొడి వేసి కలపాలి. బాగా మరిగించుకోవాలి. ఇందులే చింతపండు గుజ్జు వేసుకోనక్కర్లేదు. మీకు నచ్చితే కొద్దిగా బెల్లం వేసుకోండి.

కడాయిలో కొద్దిగా నూనె వేసి.. కొద్దిగా ఆవాలు, కరివేపాకు మాత్రమే వేసి వేయించుకుని రసంలో తాలింపు పెట్టాలి. అప్పుడే వేసుకున్న వేడి వేడి ఇడ్లీల్లో ఈ రసం కలుపుకుని తింటే.. సూపర్ అంటారు. ఈ రసం ఇడ్లీల్లోకే కాదు.. విడిగా తాగడానికి కూడా చాలా బాగుంటుంది. జలుబు చేసినా, గొంతు బాలేకపోయినా వేడి వేడిగా ఈ రసం తాగితే బెటర్ ఫీలింగ్ ఉంటుంది.

Share

• 
• 
• 
• 
• 
•