ఎలక్ట్రిక్ స్కూటర్లు తయారు చేసే ఓలా… తక్కువ బడ్జెట్లో రెండు స్కూటర్లను లాంచ్ చేసింది. రూ.99,999కి S1, రూ.84,999కి S1 ఎయిర్ మోడళ్లను అందుబాటులోకి తెచ్చింది. ధర తక్కువ కాబట్టి వీటి బ్యాటరీ కెపాసిటీ, రేంజ్ కూడా తక్కువే. 2 కిలోవాట్ల బ్యాటరీ సామర్థ్యంతో తీసుకొచ్చిన S1 స్కూటర్ సింగిల్ ఛార్జ్‌తో 91 కిలోమీటర్లు, S1 ఎయిర్ సింగిల్ ఛార్జ్‌తో 85 కిలోమీటర్లు ప్రయాణిస్తాయి. S1 టాప్ స్పీడ్ గంటకు 90 కిలోమీటర్లు కాగా… S1 ఎయిర్ టాప్ స్పీడ్ గంటకు 85 కిలోమీటర్లు. ఆ వేగంతో వెళ్తే… అవి ప్రయాణించే దూరం కూడా తగ్గిపోతుంది. ఎందుకంటే… ఎక్కువ స్పీడ్ వల్ల అధికంగా విద్యుత్ ఖర్చవుతుంది కాబట్టి. లో స్పీడ్ జర్నీ చేస్తేనే… కంపెనీ పేర్కొన్న మైలేజ్ అందుకోవచ్చు.

S1 ఎయిర్ వేరియంట్‌లో… మొత్తం మూడు బ్యాటరీ ఆప్షన్స్‌ ఉన్నాయి. 2 కిలోవాట్ల బ్యాటరీతో 85 కిలోమీటర్లు, 3 కిలోవాట్ల బ్యాటరీతో 125 కిలోమీటర్లు, 4 కిలోవాట్ల బ్యాటరీతో 165 కిలోమీటర్లు ప్రయాణించవచ్చు. ఈ మూడు వేరియంట్ల గరిష్ట వేగం 85 కిలోమీటర్లేనని ఓలా పేర్కొంది. గతంలో 2.5 కిలోవాట్ బ్యాటరీతో S1 ఎయిర్‌ బుక్‌ చేసిన యూజర్లు… ఆటోమేటిక్‌గా 3 కిలోవాట్ల బ్యాటరీకి అప్‌గ్రేడ్‌ అవుతారని ఓలా తెలిపింది.

కొత్త మోడళ్లు లాంచ్ చేయడంతో… మొత్తం 6 ఓలా ఎలక్ట్రిక్ స్కూటర్లు అందుబాటులోకి వచ్చినట్లైంది. ఇప్పటికే మార్కెట్లో ఉన్న S1, S1 ప్రో వేరియంట్లకు అదనంగా S1 ఎయిర్‌లో మూడు వేరియంట్లు, S1లో ఒక వేరియంట్‌ రాబోతున్నాయి. యూజర్ల నుంచి వచ్చిన ఫీడ్‌బ్యాక్‌ను పరిగణనలోకి తీసుకుని ఈ మార్పులు చేసినట్లు ఓలా ఎలక్ట్రిక్‌ సహ వ్యవస్థాపకుడు భవీష్ అగర్వాల్ తెలిపారు. మార్పుల కారణంగా స్కూటర్ల డెలివరీ మూడు నెలలు ఆలస్యం అవుతుందని చెప్పారు.

Share

• 
• 
• 
• 
• 
•