Tips for Investments: చాలామంది పొదుపు చేస్తారు. కానీ.. తమ భవిష్యత్ అవసరాలకు తగినట్లుగా పొదుపు చేసేవారు మాత్రం కొద్దిమందే ఉంటారు. ఇక.. తమ పెట్టుబడిని మార్కెట్కు తగ్గట్టుగా మార్చుతూ దానిని రెట్టింపు చేసేవారు మాత్రం బహుకొద్ది మందే. మరి.. మీరూ మీ పెట్టుబడిపై మంచి లాభాలను అందుకోవాలనుకుంటే.. ఈ కిందివి చదవాల్సిందే.
వయసు
కొత్తగా జాబ్లో చేరిన 30 ఏళ్లలోపు వారు.. ఎఫ్డీలు, పన్ను ఆదా పీపీఎఫ్ల కంటే మ్యూచువల్ ఫండ్లలో పెట్టుబడి పెట్టాలి. వీటిలో ద్రవ్యోల్బణానికి మించిన ఆదాయం వచ్చే ఛాన్సుంది. అయితే, మార్కెట్ పడిపోగానే సిప్ ఆపటం, విత్డ్రా చేయటం వద్దు. మ్యూచువల్ ఫండ్లు దీర్ఘకాలంలోనే లాభిస్తాయని గుర్తించాలి.
రిటైర్మెంట్ ప్లాన్
40 ఏళ్ల వారు పోస్ట్ రిటైర్మెంట్ ఖర్చులకోసం.. డైవర్సిఫైడ్ ఈక్విటీ స్కీమ్లో మదుపు చేయొచ్చు. 30 ఏళ్ల వ్యక్తి.. నెలకు రూ.2వేలు, 30 ఏళ్లపాటు సిప్ వేసి, ఏటా 10% పెంచుకుంటూ పోతే.. 12% రాబడి మేరకు రూ. 1.75 కోట్లు అందుతాయి. అదే.. 40 ఏళ్ల వ్యక్తికైతే ఆ మొత్తం రావాలంటే నెలకు రూ.9 వేలు కట్టాలి.
ఒకేచోట వద్దు
పెట్టుబడి ఏదైనా ఒకే చోట పెట్టకూడదు. పెట్టుబడిని స్టాక్స్, బాండ్లు, భూమి, బంగారం, బ్యాంకు ఎఫ్డీ.. ఇలా వేర్వేరు చోట్ల కొంత కొంత పెట్టుబడిగా పెట్టుకుంటే నష్టభయం ఉండదు. అలాగే.. పిల్లల విద్య, వివాహం, రిటైర్మెంట్, ఇంటి నిర్మాణం. వంటి అంశాల్లో మీకు ఏ టైంకి డబ్బు చేతికి రావాలో అంచనా వేసుకుని అందుకు తగిన టైం పీరియడ్ ప్రకారం ముందుగా పెట్టుబడి పెట్టాలి.
ఇతర అంశాలు
డీమ్యాట్ అకౌంట్ ఉంది కదా అని సరైన అవగాహన లేకుండా షేర్లు కొనటం వంటివి చేయొద్దు. అలాగే.. మీ పెట్టుబడి మీద వచ్చే ఐటీ వంటి పన్ను సదుపాయాలను వినియోగించుకోవటం కూడా మరచిపోవద్దు.