Storm Warning Symbols : తుఫాను వేళ.. రేడియో, టీవీల్లో తరచూ ‘ఫలానా చోట తుఫాను హెచ్చరిక చిహ్నాన్ని ఎగరవేశారు’ అనే మాట వింటుంటాం. అసలు ఈ తుఫాను హెచ్చరిక అంటే ఏమిటి? ఈ చిహ్నాలకు అర్థమేమిటి? అనే వివరాల్లోకి వెళితే.. తుఫాను తీవ్రత ఎంత? అది ఎక్కడ తీరాన్ని, ఏ దిశలో దాటబోతోంది? వంటి పలు అంశాల ఆధారంగా వాతావరణ శాఖ మొత్తం 11 రకాల తుఫాను హెచ్చరికల చిహ్నాలను వాడుతుంది. ఈ హెచ్చరికలను బట్టి ప్రజలను సురక్షిత ప్రాంతాలకు తరలించడం, జాలర్లు చేపల వేటకు వెళ్లకుండా నిలువరించడం, విపత్తు నివారణ బృందాలు సహాయ చర్యలు చేపడతారు.

> సముద్రంలో తుఫాను ఏర్పడే అవకాశం ఉందని వాతావరణ శాఖ భావిస్తే.. వెంటనే 1వ నంబరు ప్రమాద హెచ్చరికను జారీ చేస్తారు.
> సముద్రంలో తుఫాను నిర్ధారణ అయిన వెంటనే ప్రజలను జాగ్రత్తగా ఉండమని హెచ్చరించేందుకు 2వ నెంబరు ప్రమాద హెచ్చరికను జారీ చేస్తారు.
> 3వ నెంబరు హెచ్చరిక అంటే.. ఉన్నట్లుండి పెద్ద గాలులతో వర్షం కురిసే అవకాశం ఉందని హార్బర్‌లో హెచ్చరికలు జారీచేయడం. నౌకాశ్రయంలోని పడవలు, నౌకలను సురక్షిత ప్రాంతంలో నిలపాలని ఇది సూచిస్తుంది.
> 4వ నెంబరు చిహ్నం ఎగురవేస్తే నౌకాశ్రయం, తీర ప్రాంతాల్లోని జాలరులు, పడవలు సముద్రంలోకి వెళ్లరాదని అర్థం.
> ఇక.. 5వ నెంబరు చిహ్నం ఎగరవేశారంటే.. తుఫాను నౌకాశ్రయానికి కుడి వైపు తీరం దాటబోతోందని అర్ధం.

> అదే.. 6వ నంబరు చిహ్నం ఎగరవేస్తే.. తుఫాను నౌకాశ్రయానికి ఎడమవైపు తీరం దాటబోతోందని అర్థం.
> ఒకవేళ.. 7వ నెంబరు ప్రమాద హెచ్చరిక జారీ అయితే.. నౌకాశ్రయం, దాని సమీప ప్రాంతాలపై తుఫాను తీవ్ర ప్రభావాన్ని చూపబోతోందని అర్థం.
> తీరంలో 8వ హెచ్చరిక చిహ్నం ఎగరవేశారంటే.. నౌకాశ్రయానికి కుడివైపు భీకరమైన తుఫాను తీరం దాటబోతోందని, > అదే.. 9వ నెంబరు ఎగురవేస్తే.. నౌకాశ్రయానికి ఎడమవైపు భయంకర తుఫాను తీరం దాటనుందని అర్థం.
>10వ నెంబరు చిహ్నం ఎగుర వేస్తే.. హార్బర్‌, చుట్టుపక్కల ప్రాంతాలు ప్రమాదంలో పడినట్టేనని హెచ్చరించటంతో సమానం.
> ఈ జాబితాలో చివరిదైన.. 11వ నెంబరు హెచ్చరిక జారీచేస్తే.. ఆ తుఫాను ఘోర విలయాన్ని సృష్టించబోతోందని అర్ధం.

Share

• 
• 
• 
• 
• 
•