Israel-Hamas War : హమాస్‌ ఉగ్రవాదుల చెరలో ఉన్న దాదాపు 240 మంది బందీల్లో చాలా మందికి విముక్తి లభించనుంది. బంధీలను విడుదల చేయాలంటే కాల్పుల విరమణకు అంగీకరించాలంటూ హమాస్ చేసిన డిమాండ్‌ను ఇజ్రాయెల్ అంగీకరించింది. ఇజ్రాయెల్‌ కేబినెట్‌ నాలుగు రోజుల పాటు కాల్పుల విరమణకు అంగీకరిస్తూ నిర్ణయం తీసుకుంది. బంధీలను క్షేమంగా విడిపించడానికి ఇజ్రాయెల్, అమెరికా, ఖతార్‌ దేశాలు ప్రయత్నాలు ఫలించాయి.

బంధీలను విడుదల చేయాలంటే ఇజ్రాయెల్‌ సైన్యం తాత్కాలికంగా కాల్పుల విరమణ పాటించాలని, గాజాలోకి పెద్ద ఎత్తున మానవతా సాయాన్ని అనుమతించాలని, ఇజ్రాయెల్‌ జైళ్లలో మగ్గుతున్న పాలస్తీనా ఫైటర్లను విడుదల చేయాలని హమాస్‌ షరతు విధించింది. దీనికి ఇజ్రాయెల్‌ అంగీకరించింది.

రోజుకు 10 నుంచి 13 మంది వరకు బందీలను విడిచి పెట్టేందుకు హమాస్‌ అంగీకరించింది. అయితే కాల్పుల విరమణను పాటించాలని.. ఇజ్రాయెల్‌ జైళ్లల్లో ఉన్న వందలాది ఫైటర్లను విడుదల చేయాలని షరతు విధించింది. అయితే తమ దేశ బంధీల విడుదలపైనే ఫోకస్ చేసిన ఇజ్రాయెల్‌ ఈ షరతులకు అంగీకారం తెలిపింది. మొత్తం 50 మంది వరకు ఇజ్రాయెల్‌ బంధీలు విడుదల కానున్నారు. వీరిలో మహిళలు, చిన్నారులకే అధిక ప్రాధాన్యం ఇవ్వనున్నట్టు తెలిపారు.

ఇక ఇజ్రాయెల్ జైళ్లల్లో ఉన్న హమాస్ ఫైటర్లు కూడా విడుదల కానున్నారు. మొత్తం 150 మంది వరకు హమాస్‌ ఫైటర్లు విడుదల చేసేందుకు ఇజ్రాయెల్ అంగీకరించింది. ముగ్గురు పాలస్తీనియన్‌ ఖైదీలకు చొప్పున బదులుగా ఒక్కో బందీని విడిచిపెడుతుంది హమాస్‌. తమ ఫైటర్లను విడిపించుకోవడానికి బందీలను ఎరగా వాడుకోవాలని హమాస్‌ నిర్ణయించుకుంది. అయితే పూర్తి స్థాయిలో బంధీలను విడిచిపెట్టడం.. హమాస్‌ను అంతం చేయడం.. ఈ రెండు జరిగే వరకు తమ యుద్ధం ఆగదని ఇజ్రాయెల్ ప్రధాని బెంజిమన్ నెతన్యాహు తేల్చి చెప్పారు.

Share

• 
• 
• 
• 
• 
•