Tomatoes : అంతర్జాతీయ అంతరిక్ష కేంద్రం(ISS)లో గల్లంతైన రెండు టమేటోలు తిరిగి దొరికాయన్న వార్తలు ఇటీవల ఇంటర్నెట్‌లో చక్కర్లు కొట్టింది. ఎప్పుడో 8 నెలల క్రితం దొరకకుండాపోయిన అవి మళ్లీ లభ్యం కావడం వింతే. ఇన్ని నెలలైనా ఆ టమేటోల్లో ఎలాంటి ఫంగస్ లేదా సూక్ష్మజీవుల పెరుగుదల కనిపించకపోవడం శాస్త్రవేత్తలను మరింత ఆశ్చర్యంలో ముంచెత్తుతోంది.

మట్టి, ఇతర వృద్ధి మాధ్యమాల సాయం లేకుండా మొక్కలను పెంచే క్రమంలో ఎక్స్‌రూట్స్(eXposed Root On-Orbit Test System-XROOTS) ప్రయోగాన్ని నాసా 2022లో చేపట్టింది. హైడ్రోపోనిక్, ఏరోపోనిక్ పద్ధతుల ద్వారా నాసా ఆస్ట్రోనాట్ ఫ్రాంక్ రూబియో ఆ టమేటోలను పండించారు. మూన్, మార్స్ వంటి భవిష్యత్తు స్పేస్ ప్రయోగాల దృష్ట్యా మొక్కల పెంపకంపై నాసా పరిశోధనలు చేపట్టింది.

రూబియో పండించిన టమేటోల్లో రెండు గల్లంతై 8 నెలల తర్వాత దొరకడం, అవీ చెడిపోకుండా ఉండటం ఆసక్తి రేపుతోంది. కాకపోతే ఆ టమేటోల్లో నీటి పరిమాణం తగ్గిపోయి కొంత రంగు మారిపోయి మెత్తబడినట్టు నాసా శాస్త్రవేత్తలు గుర్తించారు. కానీ అదే భూమిపై అవి అంతకాలం నిల్వ ఉండటం అసాధ్యం.

అంతరిక్ష వాతావరణంలో 8 నెలలైనా టమేటోలు చెక్కుచెదరకపోవడం, సూక్ష్మజీవులు ఏవీ వాటిలో చేరకపోవడం ఇప్పుడు శాస్త్రవేత్తల దృష్టిని ఆకట్టుకుంది. ఆ రెండు టమేటోలను భూమికి పంపే ఆలోచన ఏదీ లేదని నాసా తెలిపింది. ఐఎస్‌ఎస్‌లో మొక్కల పెంపకంపై పరిశోధనలు కొనసాగుతాయని స్పష్టం చేసింది.

Share

• 
• 
• 
• 
• 
•