Vishwak Sen: తెలుగు చిత్ర పరిశ్రమ.. పాన్ ఇండియా లెవెల్లో గుర్తింపు తెచ్చుకుంటుంది. మన హీరోలు.. ప్రపంచంలో ఏ మూలకు వెళ్లినా గుర్తుపడుతున్నారు. బాహుబలి దగ్గరనుంచి మొదలైన ఈ గుర్తింపు.. ఇప్పుడు ప్రతి సినిమాకు పాకింది. ఈ మధ్యకాలంలో కొన్ని సినిమాలను జపాన్ లో రిలీజ్ చేస్తున్న విషయం తెల్సిందే.
ఎక్కువ రాజమౌళి.. తన సినిమాలను జపాన్ లో రిలీజ్ చేస్తాడు. బాహుబలి, ఆర్ఆర్ఆర్ సినిమాలకు జపాన్ ఫ్యాన్స్ ఫిదా అయ్యారు అంటే అతిశయోక్తి కాదు. రానా , ఎన్టీఆర్, రామ్ చరణ్, అడివి శేష్ .. ఇలా వీరందరికి జపాన్ లో సపరేట్ ఫ్యాన్ బేస్ ఉంది. తాజాగా ఆ లిస్ట్ లో చేరిపోయాడు విశ్వక్ సేన్.
అవును.. మీరు వింటుంది నిజమే.. విశ్వక్ కు జపాన్ లో లేడీ ఫ్యాన్స్ ఉన్నారట. వారు.. విశ్వక్ ను కలవడం కోసం ఇండియా రావడమే కాకుండా విశ్వక్ ఆఫీస్ కు వెళ్లి సర్ ప్రైజ్ చేశారు. సోషల్ మీడియాలో నిత్యం యాక్టివ్ గా ఉండే విశ్వక్ సినిమాలను జపాన్ లో కూడా చూస్తారట. ఇక విశ్వక్ ను కలిసిన లేడీ ఫ్యాన్స్.. ఆనందాన్ని మాటల్లో వర్ణించలేకపోయారు.
విశ్వక్ ను చూడగానే వారు ఆనందంతో ఆశ్చర్యపోయారు. కొద్దిసేపు విశ్వక్ వారితో ముచ్చటించాడు. అనంతరం.. విశ్వక్ మీద ఉన్న ప్రేమను లేఖల రూపంలో చూపించారు. తాము కలెక్ట్ చేసిన ఫోటోలను, లెటర్స్ ను చూపించారు. ఇందుకు సంబంధించిన ఫోటోలు వీడియోలు నెట్టింట వైరల్ గా మారాయి.
ఇకపోతే విశ్వక్ ప్రస్తుతం వరుస సినిమాలతో బిజీగా ఉన్నాడు. గ్యాంగ్స్ ఆఫ్ గోదావరి బాక్సాఫీస్ వద్ద ఆశించిన ఫలితాన్ని అందివ్వలేకపోవడంతో ఈసారి మంచి హిట్ కొట్టాలని విశ్వక్ చూస్తున్నాడు. మరి తన తదుపరి సినిమాలతో విశ్వక్ ఎలాంటి విజయాన్ని అందుకుంటాడో చూడాలి.