Sukumar: నేచురల్ స్టార్ నాని హీరోగా కొత్త డైరెక్టర్ శ్రీకాంత్ ఓదెల తెరకెక్కించిన తాజా చిత్రం దసరా. పాన్ ఇండియా లెవల్లో రిలీజ్ అయిన ఈ మూవీ ఘన విజయం సాధించింది. బాక్సాఫీస్ వద్ద రికార్డ్స్ బద్దలు కొడుతోంది. కాసుల వర్షం కురిపిస్తోంది. ఇక ఈ సినిమాపై దిగ్గజ దర్శకుడు సుకుమార్ ప్రశంసలు కురిపించారు. తన శిష్యుడు శ్రీకాంత్ ఓదెల సినిమా తెరకెక్కించిన విధానం చూసి ఆనందంతో మురిసిపోయారు. ఈమేరకు సోషల్ మీడియాలో ఇంట్రెస్టింగ్ కామెంట్స్ చేశారు.
‘‘దసరా సినిమా చూశాక నా హృదయం సంతోషంతో నిండిపోయింది. వీర్లపల్లి ప్రపంచంలోకి శ్రీకాంత్ ఓదెల నన్ను తీసుకెళ్లాడు. అతని విజువల్ నరేషన్ అద్భుతం. నా మతి పోయింది. ధరణి పాత్రలో నాని, వెన్నెల పాత్రలో కీర్తి సురేష్ అదరగొట్టారు. దసరా సినిమా బృందానికి నా అభినందనలు’’ అంటూ రాసుకొచ్చారు సుకుమార్.
ఇక సుకుమార్ చేసిన కామెంట్స్ సోషల్ మీడియాలో వైరలవుతున్నాయి. ఇకపోతే ఒక్క సుకుమారే కాదు.. యావత్ సినీ ఇండస్ట్రీ దసరా మూవీపై ప్రశంసలు కురిపిస్తోంది. దర్శకుడు తెరకెక్కించిన విధానం.. నాని, కీర్తి సురేష్ల నటనను పొగుడుతూ సోషల్ మీడియాలో పెద్ద ఎత్తున కామెంట్లు వస్తున్నాయి.