Sonu Sood Deep Fake Video : ఎంతో మంది ప్రముఖుల ముఖాలను డీప్ ఫేక్ చేసి సైబర్ నేరగాళ్లు మోసం చేస్తున్నారు. ఇప్పటికే చాలా మంది ప్రముఖుల డీప్‌ ఫేక్‌ వీడియోల కారణంగా ఇబ్బందులు ఎదుర్కొన్నారు. ఇప్పుడు ఈ జాబితాలోకి బాలీవుడ్‌ నటుడు సోనూసూద్‌ చేరారు. కరోనా సమయంలో ఎంతో మందికి ఆయన కష్టసమయాల్లో అండగా నిలిచి రియల్‌ హీరో అనిపించుకున్నారు. కొందరు ఆకతాయలు ఇప్పుడు ఆయన ఫేక్‌ వీడియోను రూపొందించి అభిమానులను డబ్బులు అడుగుతున్నారు. దీనిపై జాగ్రత్తగా ఉండాలని సోనూసూద్‌ తన సోషల్‌ మీడియా ద్వారా సూచించాడు.

‘కొందరు నా డీప్‌ ఫేక్‌ వీడియోను క్రియేట్‌ చేసి అభిమానులతో చాటింగ్‌, వీడియో కాల్‌ చేసి డబ్బులు వసూలు చేయాలని చూస్తున్నారు. చాలా మంది అమాయకులు ఆ వీడియోలో ఉన్నది నేనే అనుకుని సైబర్‌ నేరగాళ్ల వలలో పడుతున్నారు. ఇలాంటి వీడియో కాల్స్‌ వస్తే నమ్మకండి.. జాగ్రత్తగా ఉండండి’ అని ఆయన అభిమానులను కోరారు. నిజ జీవితంలో జరిగిన ఇలాంటి ఘటనల మీదే.. ‘ఫతే’ (FATEH) సినిమా తీస్తున్నట్లు చెప్పారు. డీప్ ఫేక్‌, లోన్‌ యాప్స్‌ వల్ల జరుగుతున్న సైబర్‌ నేరాలను అందులో చూపిస్తున్నట్టు తెలిపారు.

ఇటీవల డీప్ ఫేక్ వీడియో ఘటనలు చాలా జరిగాయి. రష్మిక డీప్‌ ఫేక్ వీడియో వైరల్‌గా మారింది. ఆ తర్వాత అలియా భట్‌, కాజోల్‌, కత్రినా కైఫ్‌, ప్రియాంక చోప్రా కూడా డీప్ ఫేక్‌ వీడియోల బారిన పడ్డారు. తాజాగా సచిన్‌ కూడా దీని బారిన పడ్డారు. ఇప్పటికే వీటిపై పలువురు ప్రముఖులు ఆగ్రహం వ్యక్తం చేశారు. ఇలాంటి ఘటనలకు పాల్పడుతున్న వారిపై కఠిన చర్యలు తీసుకోవాలని కోరారు. వీటిని నివారించేందుకు చర్యలు తీసుకోవాలని డిమాండ్ చేశారు.

Share

• 
• 
• 
• 
• 
•