Oscars : ఊహించినట్లుగానే ఆర్ఆర్ఆర్ సినిమా ఎట్టకేలకు ఆస్కార్ బరిలోకి దిగడానికి మొదటి అడుగు వేసింది. ఆస్కార్ నామినేషన్స్కు ముందు వివిధ విభాగాలు, క్యాటగరీల్లో ఉన్న సినిమాల లిస్ట్ను ఆస్కార్ అకాడమీ ప్రకటించింది. ఈ లిస్ట్లో ఉత్తమ ఒరిజినల్ సాంగ్ క్యాటగరీలో ఆర్ఆర్ఆర్ మూవీలోని ‘నాటు నాటు’ సాంగ్ చోటు సంపాదించుకుంది. బాక్సాఫీస్లో ఆర్ఆర్ఆర్ టీం ఇప్పటికే రికార్డ్ సాధించింది. ఇక ఆస్కార్లో చోటు సంపాదించడమే లేట్ అని టాక్ కూడా వినిపించిన విషయం తెలిసిందే.
నామినేషన్కు ఎంపిక చేసే సినిమాల్లో మొత్తం పది విభాగాలుంటాయి. ఈ పది విభాగాల్లో నాలుగింటిలో భారతీయ సినిమాలు చోటు సంపాదించుకున్నాయి. ఉత్తమ అంతర్జాతీయ సినిమా క్యాటగరీలో ‘లాస్ట్ ఫిల్మ్ షో’, ఒరిజినల్ సాంగ్ కేటగిరీలో ‘ఆర్ఆర్ఆర్ మూవీలోని నాటు నాటు సాంగ్’, ఉత్తమ డాక్యుమెంటరీ ఫీచర్ క్యాటగరీలో ‘ఆల్ దట్ బ్రీత్స్’, ఉత్తమ డాక్యుమెంటరీ షార్ట్ ఫిల్మ్ విభాగంలో ‘ది ఎలిఫెంట్ విష్పరర్’ చోటు సంపాదించుకున్నాయి.
నామినేషన్స్కు ఎంపకి చేసిన లిస్ట్లోని వాటికి జనవరి 12 నుంచి 17 వరకు వోటింగ్ జరుగుతుంది. జనవరి 24న ఆస్కార్కు నామినేట్ అయిన చిత్రాల వివరాలను వెళ్లడిస్తారు. ఫైనల్ ఆస్కార్ అవార్డ్స్ ప్రదానం మార్చ్ 2023లో జరుగుతుంది. కలెక్షన్స్లో బాలీవుడ్ను దాటేసిన రాజమౌళి..ఆస్కార్ సాంధించి కొత్త చరిత్ర సృష్టిస్తారా చూడాలి.