Netflix : ప్రముఖ ఓటీటీ ప్లాట్ ఫారమ్, వీడియో స్ట్రీమింగ్ దిగ్గజమైన నెట్ ఫ్లిక్స్ మరోసారి యూజర్లకు షాకిచ్చేందుకు సిద్ధమవుతోంది. ఈ విషయాన్ని వాలస్ట్రీట్ జర్నల్ వెల్లడించింది. త్వరలో లేదా వచ్చే ఏడాది నెట్ ఫ్లిక్స్ సబ్ స్క్రిప్షన్ ధరలను పెంచనుందంటూ జర్నల్ కథనంలో పేర్కొంది. గతంలో నెట్ ఫ్లిక్స్ సబ్ స్క్రిప్షన్ ధరల పెంపుపై వచ్చిన నివేదికలను ఉటంకిస్తూ.. అవి నిజమేనంటూ.. తన కథనంలో హైలెట్ చేసింది. అయితే.. సబ్ స్క్రిప్షన్ మార్పులపై ఇంకా స్పష్టత రాలేదు కానీ.. ముందుగా అమెరికా, కెనడా వంటి దేశాల్లో ధరలను పెంచనున్నట్లు తెలుస్తోంది.
నెట్ ఫ్లిక్స్ నెలవారీ సబ్ స్క్రిప్షన్స్, వార్షిక సబ్ స్క్రిప్షన్ల ధరల పెంపుపై తీసుకునే నిర్ణయం భారత యూజర్లకు కూడా వర్తిస్తుందా ? లేదా ? అన్న విషయం తెలియాల్సి ఉంది. అయితే.. గ్లోబల్ మార్కెట్ మాత్రం నెట్ ఫ్లిక్స్ ధరలు పెరుగుతాయని పరిశ్రమ వర్గాలు భావిస్తున్నాయి. గతేడాదే ధరలను పెంచిన నెట్ ఫ్లిక్స్.. ఇప్పుడు మరోసారి ధరలను పెంచనుందని తెలిసి యూజర్లు అసంతృప్తి వ్యక్తం చేస్తున్నారు. పాస్ వర్డ్ షేరింగ్ పై కూడా ఆంక్షలు విధించిన విషయం తెలిసిందే. కొద్దిరోజులకే ఆ విధానానికి స్వస్తి పలకడంతో యూజర్లు పెరిగారు. కానీ.. మళ్లీ సబ్ స్క్రిప్షన్ ధరలు పెంచుతుండటంతో.. నెట్ ఫ్లిక్స్ కు బదులు ఇతర ఓటీటీ నెట్ వర్క్ లను వినియోగించేందుకే మొగ్గు చూపుతున్నారు.