R.Subbalakshmi: సౌత్ సినీ ఇండస్ట్రీలో మరో విషాదం జరిగింది. సీనియర్ నటి ఆర్. సుబ్బలక్ష్మి (87) కన్నుమూశారు. కొంతకాలంగా అనారోగ్యంతో బాధపడుతున్న ఆమె కొచ్చిలోని ప్రైవేటు ఆసుపత్రిలో చికిత్స పొందుతూ గురువారం (నవంబర్ 30) రాత్రి తుదిశ్వాస విడిచారు. సుబ్బలక్ష్మి మరణించిన విషయాన్ని ఆమె మనవరాలు సోషల్ మీడియా ద్వారా వెల్లడించింది. నా బలం, మా అమ్మమ్మను నేను కోల్పోయానంటూ ఆమె ఎమోషనల్ పోస్ట్ చేసింది.
కాగా.. సుబ్బలక్ష్మి తెలుగు, తమిళ, మలయాళ భాషల్లో మొత్తం 70కు పైగా సినిమాల్లో నటించారు. తెలుగులో ఆమె కల్యాణ రాముడు సినిమాలో, నాగచైతన్య-సమంత జంటగా నటించిన తొలిసినిమా ఏమాయ చేశావె లో సమంతకు అమ్మమ్మగా నటించి మంచి గుర్తింపు తెచ్చుకున్నారు. చివరిగా విజయ్ దళపతి నటించిన బీస్ట్ సినిమాలో సుబ్బలక్ష్మి కనిపించారు. బుల్లితెరపై కూడా ఎన్నో సీరియల్స్ లో నటించారామె.
సుబ్బలక్ష్మి సినీ పరిశ్రమలోకి రాకముందు జవహర్ బాలభవన్ లో సంగీత, నాట్య శిక్షకురాలిగా పనిచేశారు. 1951లో ఆల్ ఇండియా రేడియోలో ఉద్యోగినిగా సేవలందించి.. తొలి లేడీ కంపోజర్ గా రికార్డు సృష్టించారు. డబ్బింగ్ ఆర్టిస్టుగా కూడా పనిచేశారు. ఆర్. సుబ్బలక్ష్మి ఇక లేరని తెలిసి సినిమా ఇండస్ట్రీకి చెందిన ప్రముఖులు సంతాపం తెలుపుతున్నారు.