Kotamreddy : నెల్లూరులో రాజకీయం మరోసారి వేడెక్కింది. నెల్లూరు రూరల్ ఎమ్మెల్యే కోటంరెడ్డి శ్రీధర్ రెడ్డిని పోలీసులు హౌస్ అరెస్ట్ చేశారు. దీంతో ఉద్రిక్త పరిస్థితులు నెలకొన్నాయి.
క్రిస్టియన్ కమ్యూనిటీ హాల్ నిర్మాణానికి నిధులు విడుదల చేయాలని ఆయన నిరసనకు పిలుపునిచ్చారు. అయితే ఈ ఆందోళనకు అనుమతి లేదని పోలీసులు స్పష్టం చేశారు. అయినాసరే కోటంరెడ్డి నిరసన తెలిపేందుకు సిద్ధమయ్యారు. ఈ క్రమంలోనే ఆయనను పోలీసులు హౌస్ అరెస్ట్ చేశారు. కోటంరెడ్డిని హౌస్ అరెస్ట్ చేశారన్న సమాచారం తెలియగానే ఆయన అభిమానులు భారీగా తరలివచ్చారు. దీంతో ఎమ్మెల్యే కోటంరెడ్డి శ్రీధర్ రెడ్డి ఇంటి వద్ద ఉద్రిక్త వాతావరణం నెలకొంది.
ఏపీ ఎమ్మెల్సీ ఎన్నికల్లో ఓటమి తర్వాత వైసీపీ నుంచి కోటంరెడ్డి శ్రీధర్ రెడ్డి బహిష్కరణకు గురయ్యారు. అంతకుముందు కూడా పార్టీ అధిష్టానంపై , ప్రభుత్వం విమర్శలు గుప్పించారు. తన నియోజకవర్గంలో అభివృద్ధికి నిధులు ఇవ్వడంలేదని నిలదీశారు. ఈ పరిణామాల నేపథ్యంలో పార్టీతో కోటంరెడ్డికి దూరం పెరిగింది.
ఎమ్మెల్యే కోటా ఎమ్మెల్సీ ఎన్నికల్లో టీడీపీ అభ్యర్థికి కోటంరెడ్డి ఓటేశారని భావించిన వైసీపీ అధిష్టానం.. ఆయనను పార్టీ నుంచి సస్పెండ్ చేసింది. ఆ తర్వాత తన వాయిస్ ను కోటంరెడ్డి మరింత పెంచారు. తరచూ ప్రభుత్వంపై విమర్శలు గుప్పిస్తున్నారు. తాజాగా మరోసారి నిరసనకు దిగేందుకు ప్రయత్నించగా పోలీసులు అడ్డుకున్నారు. ప్రభుత్వం తీరుపై కోటంరెడ్డి ఘాటు విమర్శలు చేశారు. తనను ఎందుకు అడ్డుకుంటున్నారని ప్రశ్నించారు.