Aditya L1 : సూర్యుడిపై పరిశోధనల కోసం భారత్ ప్రయోగించిన ఆదిత్య-ఎల్1 తొలిసారిగా సౌర జ్వాలలకు సంబంధించిన హై ఎనర్జీ ఎక్స్రే చిత్రాన్ని క్లిక్మనిపించింది. ఆ వ్యోమనౌకలోని హై ఎనర్జీ ఎల్1 ఆర్బిటింగ్ ఎక్స్రే స్పెక్ట్రోమీటర్ ఈ ఘనత సాధించింది. సౌర వాతావరణం అకస్మాత్తుగా ప్రకాశవంతం కావడాన్ని సౌర జ్వాలగా చెబుతుంటారు.
హై ఎనర్జీ ఎల్1 ఆర్బిటింగ్ ఎక్స్రే స్పెక్ట్రోమీటర్ ను గత నెల 27న ఇస్రో ఆన్ చేసింది. ప్రస్తుతం ఈ పరికరాన్ని పూర్తిస్థాయి పరిశీలనలకు సిద్ధం చేస్తున్నారు. ఇది సూర్యుడికి సంబంధించిన హై ఎనర్జీ ఎక్స్రే చర్యలను శరవేగంగా పరిశీలించి, అధిక రిజల్యూషన్లో చిత్రాలను అందిస్తుంది. తాజాగా అది సౌర జ్వాలలకు సంబంధించిన ఇంపల్సివ్ దశను నమోదు చేసింది. దీని ద్వారా.. సూర్యుడిలో విస్ఫోటక శక్తి విడుదల, ఎలక్ట్రాన్ త్వరణం గురించి మరిన్ని వివరాలను అందుబాటులోకి తీసుకురావొచ్చు. ఈ పరికరాన్ని బెంగళూరులో ఇస్రోకు చెందిన స్పేస్ ఆస్ట్రోనమీ గ్రూప్ అభివృద్ధి చేసింది.