KCR Resignation : తెలంగాణ సీఎం కేసీఆర్ రాజీనామా చేశారు. పూర్తి ఫలితాలు వెలువడక ముందే ఈ నిర్ణయం తీసుకున్నారు. కారులో రాజభవన్ కు వెళ్లిన సీఎం కేసీఆర్ .. గవర్నర్ కు రాజీనామా లేఖను అందించారు. కాంగ్రెస్ కు మేజిక్ ఫిగర్ సీట్లు దాటగానే కేసీఆర్ రాజీనామా చేశారు.
తెలంగాణ ఎన్నికల్లో కాంగ్రెస్ పోస్టల్ బ్యాలెట్ల కౌంటింగ్ నుంచి ఆధిక్యంలో దూసుకుపోయింది. ఈవీఎం ఓట్ల కౌంటింగ్ లో హస్తం హవా కొనసాగింది. కాంగ్రెస్ 64 స్థానాల్లో విజయభేరి మోగించింది. బీఆర్ఎస్ 40 స్థానాలకే పరిమితమైంది. బీజేపీ 8 చోట్ల విజయం సాధించింది.
మరోవైపు కాంగ్రెస్ ప్రభుత్వం ఏర్పాటుకు కసరత్తు చేస్తోంది. డిసెంబర్ 9లోపు నూతన ప్రభుత్వం ఏర్పాటు చేయాలని భావిస్తోంది. ఆ రోజు సోనియా గాంధీ బర్త్ డే. అందుకే ఆమెకు జన్మదిన కానుకగా తెలంగాణ కాంగ్రెస్ విజయాన్ని ఇస్తామని చాలారోజులుగా కాంగ్రెస్ నాయకులు చెబుతున్నారు. అదే రోజు సీఎం ప్రమాణస్వీకార కార్యక్రమం నిర్వహించే అవకాశం ఉంది. ఎల్బీస్టేడియంలో ఈ కార్యక్రమం నిర్వహించేందుకు ఏర్పాట్లు చేస్తున్నారు. ప్రమాణ స్వీకార ఏర్పాట్లపై రేవంత్ రెడ్డితో చర్చించామని డీజీపీ తెలిపారు. ఈ కార్యక్రమానికి అనేక రాష్ట్రాల సీఎంలు, ఏఐసీసీ నేతలు హాజరుకానున్నారు.