NC23 Title : టాలీవుడ్ యువ సామ్రాట్ అక్కినేని నాగచైతన్య.. చాలాకాలం తర్వాత వరుసగా ప్రాజెక్టులను లైన్లో పెడుతున్నాడు. వచ్చే నెల ధూతగా అమెజాన్ ప్రైమ్ లో వెబ్ సిరీస్ విడుదలవుతుండగా.. తాజాగా నెక్ట్స్ ప్రాజెక్ట్ పై దూకుడు పెంచాడు. నాగచైతన్య తన 23వ సినిమాను గీతా ఆర్ట్స్ బ్యానర్ లో చేస్తున్న విషయం తెలిసిందే. చందూ మొండేటి దర్శకత్వం వహిస్తున్న ఈ సినిమాలో సాయిపల్లవి మరోసారి చైతన్య సరసన నటిస్తోంది. దాంతో సినిమాపై అంచనాలు పెరిగాయి. 2018లో జరిగిన నిజజీవిత కథ ఆధారంగా తెరకెక్కుతోన్న ఈ సినిమా ప్రస్తుతం షూటింగ్ జరుపుకుంటున్నట్లు ఇండస్ట్రీ వర్గాల టాక్.
ఈ సినిమా కోసం చైతూ.. ప్రత్యేకంగా జిమ్ ట్రైనింగ్ తీసుకుంటూ బాడీ పెంచుతున్నాడు. 2018లో గుజరాత్ నుంచి 21 మంది మత్స్యకారులు వేటకు వెళ్లి అనుకోకుండా పాకిస్తాన్ కోస్ట్ గార్డ్ చెరలో చిక్కుకోగా.. వారిలో ఉన్న ఓ ఆంధ్రామత్స్యకారుడి జీవితం ఆధారంగా ఈ సినిమా తీస్తున్నట్లు ఇటీవలే నిర్మాతలు వెల్లడించారు. సినిమా రీసెర్చ్ కోసం నాగచైతన్య శ్రీకాకుళంలో మత్స్యకారులతో సముద్రంలోకి కూడా వెళ్లొచ్చాడు. నవంబర్ 23న నాగచైతన్య బర్త్ డే ను పురస్కరించుకుని.. బుధవారం సినిమా టైటిల్ ను ప్రకటించారు.
ఈ సినిమాకు తండేల్ అనే టైటిల్ ను పెట్టినట్లు తెలుపుతూ పోస్టర్ రిలీజ్ చేశారు. ఈ పోస్టర్ లో చైతూ.. సముద్రంలో ఉన్న ఒక పడవలో కూర్చొని సీరియస్ లుక్ లో.. ఫుల్ గడ్డంతో పక్కా మాస్ లుక్ లో కనిపిస్తున్నాడు. పోస్టర్ చూస్తుంటే ఇది చైతూకి మంచి హిట్ ఇచ్చే సినిమా లాగే కనిపిస్తోంది.