Chapped Lips : చలికాలంలో సాధారణంగా కనిపించే ప్రధాన సమస్య పెదాలు ఎండిపోవడం, పగలడం. పెదవులపై తేమలేక నిర్జీవంగా మారుతాయి. ఇలాంటి సందర్భాల్లో మన ఇంట్లో లభించే వస్తువులతో పెదాలకు పునర్జీవం కల్పించవచ్చని నిపుణులు చెబుతున్నారు. తేనెలో కొంచెం వ్యాజిలైన్ కలిపి ప్రతి రోజూ ఆ మిశ్రమాన్ని రాసుకుంటే పెదాలు అందంగా కనిపిస్తాయి.
ప్రతి రోజు రాత్రి నిద్రపోయే ముందు తేనెతో పెదాలపై మర్దన చేస్తే తేమను కోల్పోకుండా ఉంటాయి. శీతాకాలంలో మనకు ఎక్కువగా దాహం అనిపించదు. అయినా సరే ఎప్పటిలాగే శరీరానికి సరిపడా నీటిని తప్పకుండా తీసుకోవాలి. దాహం వేయకపోయినా సరే ప్రతి గంటకు గ్లాసు నీటిని తాగడం మంచిది. చలికాలంలో పెదాలకు అలోవెరా ఆయిల్, ఆలివ్ ఆయిల్స్ని రాసినా అద్భుతంగా పనిచేస్తాయి.
రాత్రి పడుకునే ముందుగా అలోవెరా ఆయిల్, ఆలివ్ ఆయిల్ను పెదాలకు రాసి పడుకోవాలి. ఉదయం వరకు మన పెదాలకు కావాల్సిన తేమ అందుతుంది. మిల్క్ క్రీమ్స్ వాడితే పెదవుల పగుళ్ల నుంచి విముక్తి లభిస్తుంది. అంతేకాకుండా నెయ్యిని రోజూ రాత్రి సమయంలో పెదవులకు రాసుకోవాలి. స్నానానికి ముందు కొబ్బరి నూనె వాడినా బాగా పనిచేస్తుంది. చలికాలమంతా ఈ చిట్కాలు పాటించవచ్చు.
లిప్బామ్ను పెదాలకు రాసిన కాసేపటి తర్వాత టూత్బ్రష్తో సున్నితంగా రద్దాలి. ఆ తర్వాత శుభ్రమైన గుడ్డను వేడి నీటిలో ముంచి తుడుచుకోవాలి. మళ్లీ కాసేపటి తర్వాత ఇలాగే చేయాలి. దీంతో పెదాలు మృదువుగా అవుతాయి. కొన్ని దానిమ్మ గింజలను తీసుకొని జ్యూస్ తీసి ఫ్రిజ్లో నిల్వ చేసుకోవాలి. రోజూ కొద్దిగా ఆ జ్యూస్ను తీసుకుని కాటన్బాల్స్ ముంచి పెదాలపై సున్నితంగా మర్దన చేసుకుంటే మంచి ఫలితం ఉంటుందని నిపుణులు చెబుతున్నారు.