Manobala : కోలీవుడ్ లో విషాదం చోటుచేసుకుంది. స్టార్ కమెడియన్ మనోబాల కన్నుమూశారు. తమిళ ఇండస్ట్రీలో గొప్ప కమెడియన్ గా గుర్తింపు తెచ్చుకున్న ఆయన కొంతకాలంగా అనారోగ్య సమస్యలతో బాధపడుతున్నారు. ఈ క్రమంలోనే 69 ఏళ్ల మనోబాల లివర్ సమస్యలతో ఆస్పత్రిలో చికిత్స పొందుతూ తుదిశ్వాస విడిచారు. ఆయన మృతి పట్ల కోలీవుడ్ సంతాపాన్ని వ్యక్తం చేస్తోంది.
1970ల్లో సినీ పరిశ్రమలోకి మనోబాల అడుగుపెట్టారు. 1979లో భారతీరాజా వద్ద సహాయ దర్శకుడిగా చేరారు. తమిళ సినీ పరిశ్రమలో నటుడు, దర్శకుడు, నిర్మాతగా తనదైన ముద్రవేశారు. దర్శకుడిగా 20కిపైగా సినిమాలను తెరకెక్కించారు. 3 సినిమాలకు నిర్మాతగానూ వ్యవహరించారు. దాదాపు 350 సినిమాల్లో సహాయ నటుడిగా నటించారు.
మనోబాల కామెడీ టైమింగ్కు అందరూ ఫిదా అయ్యేవారు. తమిళ స్టార్ హీరోల సినిమాల్లో ఆయన కచ్చితంగా ఉండేవారు. కమల్ హాసన్, రజనీకాంత్ చిత్రాల్లో హాస్యనటుడిగా ప్రేక్షకులను ఎంతోగానో మెప్పించారు. పలు సీరియళ్లలోనూ నటించారు. అలా బుల్లితెర ప్రేక్షకులకు చేరువయ్యారు. మనోబాల సోషల్ మీడియాలో ఎంతో యాక్టివ్గా ఉండేవారు.
తెలుగు చిత్రాల్లోనూ మనోబాల నటించారు. మహానటి, దేవదాసు, రాజ్దూత్ లాంటి చిత్రాల్లో తన నటనతో మెప్పించారు. ఇటీవల వచ్చిన వాల్తేరు వీరయ్య మూవీలో మనోబాల నటించారు. డబ్బింగ్ సినిమాలతో తెలుగు ప్రేక్షకులకు చేరువయ్యారు. టాలీవుడ్ ప్రేక్షకుల అభిమానాన్ని సొంతం చేసుకున్నారు.