Amritpal Singh: ఖలిస్తాన్ వేర్పాటువాద నేత అమృత్‌పాల్‌ సింగ్ కోసం పోలీసుల వేట కొనసాగుతోంది. 9 రోజులుగా పంజాబ్ పోలీసుల నుంచి తప్పించుకొని తిరుగుతున్న అమృత్‌పాల్‌ సింగ్‌… పూటకో వేషం మారుస్తూ పోలీసులకు బురిడీ కొడుతున్నాడు. అమృత్‌పాల్‌ సింగ్‌ పరారీకి సంబంధించి రోజుకో వీడియో వెలుగులోకి వస్తోంది. తాజాగా పటియాల ప్రాంతంలో ఆయన సంచరిస్తున్నట్లుగా సీసీ ఫుటేజీ దృశ్యాలు వైరల్‌గా మారాయ్‌. ప్యాంటు, కోటు ధరించి ఫోన్లో మాట్లాడుతూ వెళ్తున్న దృశ్యాలు రికార్డయ్యాయి. అయితే ఈ వీడియోలో ఉన్నది అమృత్‌పాల్‌ అని పోలీసులు నిర్ధారణకు రాలేకపోతున్నారు. అమృత్‌పాల్‌ సహాయకుడి నుంచి స్వాధీనం చేసుకున్న ఫోన్‌లో పలు చిత్రాలున్నాయని పోలీసులు వెల్లడించారు. ఖలిస్థానీ జెండా, ముద్ర, కరెన్సీ, ఆయుధ శిక్షణ పొందుతున్న వీడియోలు అందులో ఉన్నాయని తెలిపారు.

అమృత్‌సర్‌లోని తన బంధువుల ఇంట్లో అమృత్‌పాల్‌ సింగ్‌ గడిపినట్లు పోలీసులు అనుమానిస్తున్నారు. అక్కడి నుంచి హర్యానాలోని కురుక్షేత్రకు వెళ్లినట్లు పోలీసులు చెప్తున్నారు. కురుక్షేత్ర నుంచి ఢిల్లీ నగరానికి వెళ్లినట్లు నిఘా వర్గాలు అనుమానిస్తున్నాయ్‌. ఓ సాధువు వేషంలో ఢిల్లీకి చేరుకున్నట్లు తెలుస్తోంది. కశ్మీరు గేటులోని ఇంటర్ స్టేట్ బస్ టెర్మినల్ వద్ద ఢిల్లీ, పంజాబ్ రాష్ట్రాల పోలీసులు నిశితంగా గమనిస్తున్నారు. సీసీటీవీ ఫుటేజ్‌ను క్షుణ్ణంగా పరిశీలిస్తున్నారు. అమృత్‌పాల్‌ మద్దతుదారుల్లో చాలా మందిని పోలీసులు ఇప్పటికే అరెస్ట్‌ చేసి, వారి నుంచి కత్తులు, ఆయుధాలు, తుపాకులను స్వాధీనం చేసుకున్నారు.

అమృత్‌పాల్‌ వేటపై సిక్కులకు పవిత్రమైన అకాల్‌ తక్త్‌ స్పందించింది. తక్షణమే అతడు లొంగిపోవాలని కోరింది. వారిస్‌ పంజాబ్‌ దే నాయకుడు తక్షణమే పోలీసుల ఎదుట లొంగిపోవాలని అకాల్‌ తక్త్‌ జత్యేదార్‌ జ్ఞాని హర్‌ప్రీత్‌ సింగ్‌ కోరారు. అమృతపాల్‌ను ఇప్పటి వరకు అరెస్టు చేయకపోవడంపై హర్‌ప్రీత్‌ ఆశ్చర్యం వ్యక్తం చేశారు. ఇంత పెద్ద సంఖ్యలో పోలీసులు ఉన్నా అమృతపాల్‌ను ఎందుకు పట్టుకోలేకపోయారని ప్రశ్నించారు. అమృత్‌పాల్‌ను ఇంతకు ముందే అరెస్టు చేసి ఉంటే, పోలీసులు ఆ విషయాన్ని బయటపెట్టాలన్నారు. పంజాబ్‌లోని పరిస్థితులపై చర్చించడానికి సిక్కు సంస్థలు, మదర్సాలు, నిహాంగ్ సంస్థలతో ప్రత్యేకంగా సమావేశం కావాలని హర్‌ప్రీత్‌ సింగ్‌ నిర్ణయించారు. అయితే ఈ భేటీకి ఏ రాజకీయ సంస్థ ప్రతినిధులను ఆహ్వానించలేదు. పోలీసులు తమ కుమారుడిని పట్టుకున్నారని అమృతపాల్ తల్లిదండ్రులు ఆందోళన వ్యక్తం చేశారు.

Share

• 
• 
• 
• 
• 
•